Buku Yanga Ya Timhaka Ta Bibele

BUKU leyi yi tamele timhaka ta xiviri. Ti tekiwe ebukwini leyikulu ku tlula hinkwato emisaveni, ku nga Bibele. Timhaka ta kona ti tamele matimu lama sukelaka le ndzhaku loko Xikwembu xi tumbuluxa ku fikela eka masiku lawa hi hanyaka eka wona. Ti tlhela ti hi byela leswi Xikwembu xi tshembisaka ku swi endla enkarhini lowu taka.

Buku leyi yi ku hlamusela timhaka ta Bibele. Yi hlamusela hi ta vanhu va le Bibeleni ni swilo leswi va swi endleke. Yi tlhela yi kombisa hi ta ntshembo lowukulu wa vutomi lebyi nga heriki eparadeyisini emisaveni leyi Xikwembu xi yi nyikeke vanhu.

Buku leyi yi tamele tidyondzo ta 116. Tidyondzo leti ti avanyisiwe hi swiphemu swa nhungu. Tluka ro sungula ra xiphemu ha xin’we ri hlamusela hi ku komisa rungula leri kumekaka exiphen’wini xa kona. Tidyondzo ta kona ti landzelelana hi ku ya hi ndlela leyi timhaka ta kona ti humeleleke ha yona. Leswi swi ku pfuna leswaku u tiva leswaku timhaka leti ti hlamuseriwaka laha ti humelele rini ematin’wini.

Timhaka ta kona ti hlamuseriwe hi ku olova. Vunyingi bya n’wina lavatsongo mi ta kota ku tihlayela hi n’wexe buku leyi. N’wina vatswari mi ta xiya leswaku vana va n’wina va ta tsaka loko mi va hlayela tidyondzo leti hi ku phindha-phindha. Mi ta kuma leswaku buku leyi yi tsakisa vana swin’we ni vanhu lavakulu.

Matsalwa lama tshahiweke eBibeleni ma kumeka emakumu ya dyondzo yin’wana ni yin’wana. U khutaziwa ku hlaya swiphemu leswi swa le Bibeleni laha tidyondzo leti ti tekiweke kona.