LEGI i bhuku ga mahungu ya lisine. Wona ma susiwa bhukwini ga hombe ku hunza wontlhe ya misava, a Biblia. A mahungu lawa ma ku nyika a matimu ya misava kusukela laha Nungungulu a nga sangula ku vanga kala masikwini ya hina. Wona kambe ma hlawutela lezi Nungungulu a tsumbisako ku maha xikhatini xi tako.

A bhuku legi gi ku nyika a maalakanyo ya ku xini a Biblia. Gona gi wulawula hi vanhu va Biblia ni lezi va mahileko. Kambe gi komba a kurinzela ka hombe ka wutomi ga pinzukelwa paradiseni ga Misava loku Nungungulu a nyikako vanhu.

Ku na ni 116 wa tihloko ta mahungu lomu ka bhuku legi. Tona ti avanyisilwe hi ntlhanu wa zipanze ni zinharu. A phajina yo sangula ya xipanze xinwe ni xinwani yi wulawula hi magezu matsongwani hi lezi zi kumekako xipanzeni lexo. A mahungu lawo ma xaxametilwe hi ku lanzela a tlhatamano wa zimaho lomu ka matimu. Lezo zi ku vuna a ku tiva xikhati lexi a zilo zi nga maheka hi xona, mayelano ni zinwani zimaho.

A mahungu lawa ma hlawutelwa hi ndlela yo olova. A wunyingi ga nwina, vanana, mu ta zi kota a ku ma gonza ha nwece. Nwina vapswali mu ta wona lezaku a zivanana za nwina zi ta tsakela a ku gonzelwa mahungu lawo kambe ni kambe. Mu ta wona lezaku a bhuku legi gi na ni zo tala zi tsakisako vanhu vaswa ni vahombe kambe.

A mitsalo ya Biblia yi kumeka magumo ka tlhatlhambuto wunwe ni wunwani. Wena wa kuciwa ku gonza zipanze lezo za Biblia lomu a mahungu ma seketelwako kona. Loku u mbhetile ku gonza a tlhatlhambuto, vuxeta kambe a ziwutiso za xigonzo za tlhatlhambuto lowo zi nga nzhako ka Tlhatlhambuto 116 zonake u zama ku alakanya mihlamulo ya kona.