БО ном шын болуп турган төөгүлерден тургустунган. Олар делегейде эң кайгамчык номдан — Библиядан алдынган. Ында делегейниң бүгү төөгүзүн эдертир көргүскен: Бурганның чаяап эгелээнинден бистиң үевиске чедир. Ол ышкаш Бурган келир үеде чүнү кылыр деп аазап турарын ында бижээн.

Бо номнуң дузазы-биле бүгү Библияның дугайында билип алыр силер. Ында библейжи маадырларның база оларның чуртталгазының дугайында бижиттинген. Оон ыңай бо ном дываажаң черге мөңге чурттаар Бурганның берген кайгамчык идегелин ажыдып турар.

Номда шупту 116 төөгү бар. Олар сес кезекке чардынган. Кезек бүрүзүнде кыска допчу бар. Төөгүлерниң болуушкуннары үе дургузунда канчаар эртип турганының аайы-биле бердинген. Ындыг янзы-биле чүнүң соонда кандыг болуушкун болуп турганын билип алыр силер.

Төөгүлер бөдүүн дыл-биле бижиттинген. Уруглар, хөй кезииңер бо номну боттарыңар номчуп болур силер. А силер, ада-иелер, кажан ажы-төлүңерге бо чугааларны катап-катап номчуп бээриңерге, оларның кайы-хире амырап дыңнаарын көөр силер. Бо номда улуг-даа, биче-даа улустарга хөй солун чүүлдер барын билип алыр силер.

Төөгү бүрүзүнүң төнчүзүнде Библияже айыткан айтыглар бар. Төөгүлерниң үндезини болуп салдынган, шак ол Библияның үзүндүлерин номчуур болзуңарза, дыка эки болур.