ELIVULU eli li lombolola asapulo ocili. Asapulo aco vopiwa velivulu lia velapo okuti Embimbiliya. Olio li lombolola ovolandu atiamẽla koluali tunde eci Suku a fetika oku lulika ovina viosi toke koloneke vilo. Asapulo aco a tu sapuilavo eci Suku aka linga koloneke vi keya kovaso.

Elivulu eli li lombolola ocili Cembimbiliya. Olio li tu sapuila eci catiamẽla komanu vana va lomboluiwa Vembimbiliya kuenda eci ovo va lingaile. Handi vali, li lombololavo eci catiamẽla kelavoko Suku a eca komanu lioku kala otembo ka yi pui voluali luokaliye.

Velivulu eli, mu sangiwa eci ci soka 116 kasapulo. Asapulo aco a sokiyiwa volonepa ecelãla. Kefetikilo lionepa lonepa, ku sangiwa ocipama cimue ci lombolola loku teta onimbu ovolandu atiamẽla kasapulo a kuãimo. Asapulo aco, a lekisa ciwa ndomo ovolandu aco a pita. Ovo a kuatisa oku tepisa ciwa otembo kua pita ovolandu amue kuenda ovina vikuavo via lingiwa vokuenda kuotembo.

Asapulo aco, a lomboluiwa lonjila yimue ya leluka. Kokuene wamalẽhe, cika leluka calua oku litangela ene muẽle ovolandu aco. Ene vu lonjali, uka limbukavo okuti omãla vene vaka kuata esanju lialua poku va tangela ovolandu aco kuenda oku pitololamo. Uka limbuka okuti, elivulu eli ka li kuatisa lika omãla pole li kuatisavo akulu.

Ovipama Viembimbiliya, vi sangiwa lika kesulilo liocipama locipama. Omo liaco, poku tanga ocipama cimue cesapulo, tangavo ovinimbu viaco Viembimbiliya via tukuiwa.