ELA erii eliivuru ya myaha sekeekhai. Iyo sikumihiwee mu eliivuru yuulupalexa molumwenkuni, Biibiliya. Myaha iyo sinimoosuwelihani nyuwo sowiiraneya sa olumwenku okhuma vaavo Muluku vaapacenrya awe opattuxa mpakha mahiku ahu ala. Iyo sinnilavula-tho voohimya sa yeele Muluku enlakela awe opaka muhoolo.

Eliivuru ela enoovahani muupuwelelo voohimya sa yeeyo Biibiliya onihimya awe okhala. Ela enninleela sa atthu a mBiibiliya ni itthu seiyo awo sipanka aya. Ela-tho ennooniherya nlipelelo nuulupale na okumi woohimala mParayiisu mu elapo ya vathii nenno Muluku nivanhaawe wa atthu.

Muliivuruni-mu sookhala miyaha 116. Iyo sithukumanyiwe mipantta mithanuu ni miraruu. Epaaxina yoopacerya ya khuta mpantta enihimya mmasuu a vakhaani etthu eniphwanyaneya mu mpantta owo. Miyaha iyo sinilavuliwa moovarihana ni okathi wiiranen’yaya yookhumelela eyo. Ela enimookhaliheryani wiixutta silinii, sikhumelenly’aya itthu iyo, moovarihana ni sowiiraneya sikina.

Miyaha iya sinlavuliwa mu elavulelo yookhweya. Anceene a nyuwo muri anamwane munrowa owerya osoma iyo mekhinyu. Axitiithi nyuwo munrowa woona wi aniinyu ooyeveela anrowa osiveliwa wira mwaasomeleke miyaha iya khuta ekwaha. Munrowa oweha wi eliivuru ela yookhalana itthu sinceene sooreera wa amiravo ni hataa wa oowunnuwela.

Soolepa sa Biibiliya sinnikumiheriwa wanikisa wa khuta mwaha. Nyuwo munnilipiheriwa wira musomeke soolepa iya sa Biibiliya memmo sinikhuma aya miyaha iyo.

Masuu ooromoliwa a Biibiliya muliivuruni-mu ahimmwale mookwasa. Awo aheliwe mu elavulelo yookhweya wiiwa wira anamwane ooyeveela aweryeke wiiwexexa. Soolepa sihimmwale wanikisa wa khuta mwaha sinthoonya mathipelo a Biibiliya.