AJI jili buku ja ngani sya yakutendekwa yisyesyene. Nganisi sikutyocela m’Baibulo, jajili buku jekulungwa mnope kupundana ni mabuku gane gosope. Nganisi sili sya mbili ja cilambo kutandila pandaŵi jaŵapanganyaga Mlungu yindu, mpaka mu ndaŵi jetu jino. Sikusalasoni yacacitenda Mlungu m’bujo.

Bukuji cijamanyisye wawojo yayili m’Baibulo. Jikusala ya ŵandu ŵa m’Baibulo, soni yaŵatesile. Jikusalasoni cembeceyo cambone mnope capelece Mlungu kwa ŵandu, ca umi wangamala mu paladaiso pacilambo capasi.

M’bukumu mwana ngani syakwana 116. Nganisi tusigaŵile mbali msano ni sitatu. Peji jajili kundanda kwa mbali jilijose jikusala mwakata yayili mu mbalijo. Nganisi sikusimanikwa m’bukumu mwakamulana ni ndaŵi jayatendekwaga yinduyo. Yeleyi ciyakamucisye wawojo kuti amanyilile ndaŵi ja yakutendekwayo, mwakamulana ni yakutendekwa yine mu mbili ja ŵandu.

Nganisi tusilembile mwangasawusya. Ŵajinji mwa ŵanacemwe cimkomboleje kuliŵalanjila jika. Acinangolomwe cim’yiwone kuti ŵanace ŵacinandipile casangalaleje kwaŵalanjila nganisi ndaŵi ni katema. Bukuji jili jakusangalasya kwa ŵanace ni acakulungwa ŵakwe.

Kumbesi kwa ngani jilijose kwana malemba ga m’Baibulo. Tukwalimbikasya kuŵalanga malemba ga m’Baibuloga, ligongo ni kwasikutyocela nganisi. Pamalisisye kuŵalanga ngani, alolesoni yiwusyo ya nganijo yayikusimanikwa kumbesi kwa ngani 116 ni alinje kumbucila kwanga kwakwe.