Libru stinneʼ de ca historia ni zeeda lu Biblia

CA historia ni zeeda ndaaniʼ libru riʼ la? dxandíʼ guca cani. Zeeda cani de ti libru jma risaca ni nuu lu guidxilayú, nga nga rábinu Biblia. Cani guca riʼ la? gúcani historia dede dxi bizulú Dios bizáʼ guiráʼ ni nuu lu guidxilayú dede nagasi. Ne cayábini lii ni maʼ bizabiruaa Dios guni lu ca dxi ni zeeda ca.

Libru riʼ, culuiʼni lii caadxi de cani zeeda ndaaniʼ Biblia. Cayábini lii de ca binni zeeda lu Biblia ne xi bíʼnicabe. Laca culuíʼ ni pabiáʼ naróʼ ni cabeza binni, ti guendanabani ni qué ziuu dxi guiluxe ndaaniʼ paraísu lu Guidxilayú riʼ.

Nuu 116 historia ndaaniʼ libru riʼ, ne rilaa cani xhono ndaa. Lu primé yaza stiʼ cada ndaa la? zeeda guiniʼni ni zeeda lu ndaa ca. Ca historia riʼ la? nexheʼ chaahuiʼ cani cásipeʼ modo gúcacani. Ndiʼ zacané lii gannuʼ padxí gúcacani ne padxí guca xcaadxi de laacani.

Ca historia riʼ la? cá cani ne diidxaʼ ganda guiene binni. Stale de ca ni nahuiiniʼ ca zanda gúʼndacabe ni laasicabe. Ca bixhózecabe zuuya laacabe nayecheʼ ora chuʼ tu guʼndané laacabe ca historia riʼ. Zahuinni ca de que libru riʼ né stale ni risaca para ca nahuiiniʼ ne para cani huaniisi.

Ra riluxe ti historia la? cá caadxi textu ni zeeda ndaaniʼ Biblia. Galán gúʼndaluʼ cani purtiʼ ndaaniʼ ni biree ca historia ca. Ora maʼ bilúxeluʼ ti historia, zanda gúʼndaluʼ ca guendarinabadiidxaʼ stini ni zeeda ra riluxe historia 116 para gúʼyaluʼ xi biziidiluʼ.