LIBRO reʼ raniʼ historias ni nigolú góc. Guirá historias reʼ biréni ló toib libro ni más rasac ló Gudxlio, laani la Biblia. Guirá historias reʼ rasuidyni looy ximod gosaló Dios bisaʼ guirá ni noʼ ló Gudxlio hasta ló xtzúno. Láaca rabyni looy xi ni gony Dios ló dzú ni sietra.

Libro reʼ moda rasuidyni looy xi guirá sitné la Biblia. Rabyni looy de guirá buñ ni bibany dzúcu né xí ni bunyibu. Raduidy xiroʼ confianz lóono ni Dios gony né Gudxlio reʼ que guidxin gacni toib lagary móz ro cuésno tipzó.

Libro reʼ sitné 116 historias. Bidzoni en xhoon midid. Noʼ toib página ro rasaló toib midid ro rarexa tidxo diitz ro rabyni lóono xi guirá ni guisuidyno. Guiráxadit historias ni sieed ló libro reʼ cuáni, xomodpa gocni. Ndeʼ racné looy par guienlo pu dzú gocni né ximod canalni xitzca saʼni.

Guirá historias ni noʼ reʼ cuáni nayadit. Xidal mbioxien labúu goʼol guirá ndeʼ sin toib ni gacné layibu. Guirá ni ma noʼ xiin saduidybu cuent que ximbioxbu sioladx guicadiag xidal buelt historias reʼ órni bixiosbu goʼol láani. Saduidyno cuent que libro reʼ sitné xidal cós ni guioladxno, ná mbioxhlas o buñgol lóono.

Ro radopy toib historia noʼ xidal textos. Biquiin Biblia par goʼol lo guirá textos roʼ sieed historias reʼ. Órni ma bilox bíil lo toib historia non gonylo guirá galrranabdiitz ni sieed ro ralox historia 116. Né buny por guisetnaladxlo ximod rarexani.