AḤRIC AMEZWARU

Si txelqit ar uḥemmal n waman

Ansi i d-​kkan igenwan d lqaɛa? Amek i d-​yeflali yiṭij, wagur d yetran d wayen akk yellan ɣef lqaɛa-​nneɣ? Akken i d-​yura deg Wedlis Iqedsen, d Ṛebbi i d-​ixelqen annect-​agi meṛṛa. Ɣef waya ara nebdu taktabt-​a s teḥkayin yeɛnan taxelqit.

Lexliqat (lxuluq) timezwura n Ṛebbi ur tent-​neţwali ara. Cubant ɣur-​es, lameɛna di kra n leḥwayeǧ kan. Lexliqat-​agi d lmalayekkat. Lqaɛa, neţţat, Ṛebbi ixleq-​iţ-​id i lɛibad am nekni. Ṛebbi ixleq-​ed Adam (Adem) d Ḥewwa, yuɣal issers-​iten deg yiwen n leǧnan (tebḥirt) ifazen. Lameɛna ur s-​uɣen ara awal, ɣef wayagi i ten-​id-​issufeɣ syenna.

Seg wass n txelqit ar uḥemmal n waman ɛeddan 1656 iseggasen. Di lweqt-​nni, ɛacen waṭas n yemcumen. Deg igenni, llant lexliqat ur neţwali ara s wallen, yeɛni Cciṭan d lmalayekkat-​is n diri. Ɣef lqaɛa, yella Kayin d waṭas n yemcumen nniḍen, gar-​asen lɛibad yesɛan lǧehd ameqran. Lameɛna llan daɣen yergazen yelhan am Habil, Ḥanux (Idris) akk-​d Nuḥ. Deg weḥric amezwaru, a d-​nemmeslay ɣef yemdanen-​agi meṛṛa d wayen yeḍran di zzman-​nni.