Igũrũ na thĩ cioimire kũ? Riũa, mweri na njata o ũndũ ũmwe na indo nyingĩ gũkũ thĩ-rĩ, cioimire kũ? Biblia ĩheeanaga icokio rĩama rĩrĩa ĩkuuga ciombirwo nĩ Ngai. Kwoguo ibuku rĩrĩ riitũ rĩambĩrĩirie na ng’ano cia Biblia cia ũũmbi.

Twĩrutaga atĩ ũũmbi wa mbere wa Ngai, waarĩ wa ciũmbe cia kĩĩroho ihaanaine nake. Ciaarĩ araika. Ĩndĩ thĩ yombĩirwo andũ ta ithuĩ. Kwoguo Ngai ombire mũndũ-mũrũme na mũndũ-mũka meetagwo Adamu na Hawa na akĩmaiga thĩinĩ wa mũgũnda mũthaka. No ĩndĩ makĩremera Ngai na makĩũrwo nĩ kĩhoto gĩa gũthiĩ na mbere gũtũũra.

Mũigana wa mĩaka kuuma kũmbwo kwa Adamu nginyagia Kĩguũ kĩrĩa kĩnene, yaarĩ 1,656. Ihinda-inĩ rĩu andũ aingĩ oru nĩ matũũraga. Kũu igũrũ, nĩ kwarĩ na ciũmbe cia kĩĩroho itonekanaga, Shaitani na araika aake oru. Gũkũ thĩ, kwarĩ na Kaini na andũ angĩ aingĩ oru, o hamwe na andũ maarĩ na hinya wa mwanya. Ĩndĩ gũkũ thĩ nĩ kwarĩ andũ amwe ega—Habili, Enoku na Nuhu. Nĩ tũgũthoma ũhoro wa andũ acio othe thĩinĩ wa Gĩcunjĩ kĩa MBERE na maũndũ marĩa mekĩkire.