KIPUNGU 1
Kufuma ku Kulengwa kwa Bintu Kufika ku Kimye kya Muyulo
Nanchi meulu ne ntanda byafumine pi? Nga juba, ñondo, tubangabanga, kabiji ne bintutu bikwabo byavula biji panopantanda byaishileko byepi? Baibolo wakumbula kya kine byo aamba’mba, bino byonse byalengelwe na Lesa. Onkao mambo, buku wetu watendeka kwamba pa mashimikila a mu Baibolo aamba pa kulengwa kwa bintu.
Tufunda kuba’mba bilengwa bitanshi Lesa byo alengele byajinga bantu ba ku mupashi bepashako ne aye mwine. Bano ke bamalaika. Bino ino ntanda yalengejilwe atweba bantu amba twikalengapo. Onkao mambo, Lesa walengele mwanamulume ne mwanamukazhi, ko kuba’mba ba Adama ne Evwa ne kwibabika mu bujimi bwawamine bingi. Bino bamusatukijile Lesa, kabiji kyafuminemo bakankelwe kwikala na jishuko ja kutwajijila kwikala na bumi.
Myaka yonse pamo, kufuma pa kulengwa kwa kwa Adama kufika ku Muyulo mukatampe, yajinga 1,656. Mu ino yonse myaka kwajinga bantu batamine bingi michima. Mwiulu mwajinga bilengwa bya ku mupashi, ko kuba’mba Satana ne bamalaika banji batama. Panopantanda pajinga Kaina ne bakwabo bantu bavula batamine michima, kubikakotu ne bantu balenganga moyo bajinga bingi na bulume. Bino panopantanda pajinga ne bantu bawamine nabiji ba Abela, Enoka ne Nowa. Mu Kipungu KITANSHI tusakutangamo bano bantu bonse ne bintu byamwekelenga.
BIJI MU KINO KIPUNGU
JISHIMIKILA 1
Lesa Watendekele Kulenga Bintu
Jishimikila jaamba pa kulengwa kwa bintu jawama ne kupeela kumvwa nangwa ku banyiketu.
JISHIMIKILA 2
Bujimi Bwawama
Kwesakana na byaamba buku wa ntendekelo, Lesa walengele bujimi bwa Edena kuba’mba ikale mpunzha yawama bingi kwikalamo bantu. Lesa ubena kukeba’mba ino ntanda ikekala byonkatu byajinga bujimi bwa Edena.
JISHIMIKILA 3
Mwanamulume Mutanshi ne Mwanamukazhi Mutanshi
Lesa walengele Adama ne Evwa ne kwibabika mu bujimi bwa Edena. Bo bamulume ne mukazhi batanshi.
JISHIMIKILA 4
Ene Mambo o Bebapangijile mu Muzhi Wabo
Jishimikila jiji mu buku wa Ntendekelo jitubuula paladisa mutanshi byo abujile kutwajijila kwikalako.
JISHIMIKILA 5
Bwikalo Bwatendekele Kukatazha
Adama ne Evwa byo bajinga pangye ya bujimi bwa Edena bapichile mu makatazho avula bingi. Inge baji bakookejile Lesa, inge baikele ku matwi nzoo pamo na baana babo.
JISHIMIKILA 6
Mwana wa Mulume Wawamine ne Watamine
Jishimikila jaamba pe Kaina ne Abela jiji mu buku wa Ntendekelo jamwesha byo twafwainwa kuba pa kuba’mba tutokeshe Lesa ku muchima ne byubilo byo twafwainwa kupimpula bukiji bukiji.
JISHIMIKILA 7
Muntu Wachinchikile
Byaubile Enoka bimwesha’mba ne anweba mwakonsha kuba bintu byawama nangwa kya kuba mubena kwikala na bantu babena kuba bintu byatama.
JISHIMIKILA 8
Babiyangala Bajingako Panopantanda
Ntendekelo kitango 6 kitubuula pa bano babiyangala baikezhe bufinda bantu. Abano babiyangala batelwa’mba Banefili, bajinga baana ba bamalaika bafumine mwiulu ne kwiya pano pa ntanda kwikala bantu.
JISHIMIKILA 9
Nowa Wafiikile Bwato
Nowa ne kisemi kyanji bapulukile Muyulo mambo bakookejile Lesa nangwa kya kuba bantu bavula bakaine kumumvwina.
JISHIMIKILA 10
Muyulo Mukatampe
Bantu bamusekelenga Nowa byo ebajimwinengako muyulo saka akyangye kwiya. Bino balekele kumuseka mvula byo atendekele kunoka! Funjilaipo bishinka byalengejile Nowa, kisemi kyanji ne banyama byo bapulukile mu bwato.
