ການສ້າງຈົນເຖິງນ້ຳຖ້ວມໂລກ
ພາກ 1
ການສ້າງຈົນເຖິງນ້ຳຖ້ວມໂລກ
ຟ້າສະຫວັນແລະແຜ່ນດິນໂລກມາຈາກໃສ? ດວງອາທິດ ດວງເດືອນແລະດາວທັງຫຼາຍພ້ອມກັບສິ່ງຕ່າງໆຫຼາຍຢ່າງເທິງແຜ່ນດິນໂລກເປັນຂຶ້ນມາໄດ້ຢ່າງໃດ? ພະຄຳພີໄບເບິນໃຫ້ຄຳຕອບທີ່ແທ້ຈິງເມື່ອກ່າວວ່າສິ່ງເຫຼົ່ານີ້ໄດ້ຮັບການສ້າງໂດຍພະເຈົ້າ.
ເຮົາຈະຮຽນຮູ້ວ່າ ການສ້າງທຳອິດຂອງພະເຈົ້າ ຄືບຸກຄົນຈຳພວກກາຍວິນຍານຄ້າຍໆກັນກັບພະອົງເອງ. ພວກເຂົາຄືທູດສະຫວັນ. ແຕ່ວ່າແຜ່ນດິນໂລກຖືກສ້າງຂຶ້ນສຳລັບຄົນເຊັ່ນພວກເຮົາ. ດັ່ງນັ້ນ ພະເຈົ້າໄດ້ສ້າງຜູ້ຊາຍແລະຜູ້ຍິງຂຶ້ນ ມີຊື່ວ່າອາດາມແລະເອວາແລະພະອົງໄດ້ຈັດໃຫ້ພວກເຂົາຢູ່ໃນສວນອັນສວຍງາມ. ແຕ່ວ່າພວກເຂົາບໍ່ໄດ້ເຊື່ອຟັງພະເຈົ້າແລະໄດ້ເສຍສິດທິທີ່ຈະມີຊີວິດຢູ່ຕໍ່ໄປ.
ເລື່ອງທັງໝົດໃນທີ່ນີ້ ຈາກການສ້າງຂອງອາດາມຈົນເຖິງນ້ຳຖ້ວມຫຼວງ ເປັນເວລາ 1,656 ປີ. ໃນລະຫວ່າງສະໄໝນີ້ເກີດມີຄົນຊົ່ວຮ້າຍຈຳນວນຫຼາຍ. ໃນແດນສະຫວັນມີກາຍວິນຍານທີ່ມະນຸດເຫັນບໍ່ໄດ້ດ້ວຍຕາ ຄືຊາຕານແລະພວກທູດສະຫວັນຊົ່ວຮ້າຍຂອງມັນ. ເທິງແຜ່ນດິນໂລກນີ້ມີກາອີນແລະຄົນອື່ນໆອີກຫຼາຍໆທີ່ຊົ່ວຮ້າຍ ລວມທັງບາງຄົນທີ່ມີກຳລັງຢ່າງຜິດປົກກະຕິ. ແຕ່ກໍ່ຍັງມີຄົນດີເທິງແຜ່ນດິນໂລກດ້ວຍຄືກັນ—ເຊັ່ນອາເບນ ເຫນົກແລະໂນເອ. ໃນພາກທຳອິດເຮົາຈະອ່ານກ່ຽວກັບຜູ້ຄົນແລະເຫດການເຫຼົ່ານີ້ທັງໝົດ.
