TAXELOL 1

Peua keman Dios tachijchiuak uan tami keman Tetsaujkakiouik

¿Akoni kichijchiuak iluikak uan Taltikpak? ¿Akoni kichijchiuak Tonaltsin, Metsti uan sitalimej, ijkon kemej nochi tein onkak nikan Taltikpak? Biblia technankilia tein melauak keman kijtoua ika nochi kichijchiuak Dios. Yejika toamaix tein motaksaltia itech Biblia peua techtapouia keman Dios tachijchiuak.

Timomachtiskej ika Dios achto kinchijchiuak iluikakneminij kemej yej. Motokaytiaj ángeles. No techchijchiuilij Taltikpak maj ompa tinemikan. Yejika Dios kichijchiuak takat tein motokaytij Adán uan siuat tein motokaytij Eva uan kintalij itech se kualtsin xochital. Yejuan ueliskiaj nemiskiaj nochipaya, sayoj kemej amo kitakamatkej Dios, kipolojkej nejon tatiochiualis.

Itech tonal keman Dios kichijchiuak Adán, uan keman tetsaujkakiouik, panok 1,656 xiujmej. Itech nejon xiujmej nenkej miakej tein amo yolkualmej. Iluikak yetoyaj, Satanás uan iángeluan tein amo yolkualmej. Uan nikan Taltikpak yetoyaj Caín uan oksekin taltikpakneminij tein amo yolkualmej, ijkon kemej sekin takamej tein katkaj tamamej porin kitelpiayaj chikaualis. Sayoj ika, no nemiaj taltikpakneminij tein yolkualmej, kemej... Abel, Enoc uan Noé. Itech Taxelol SE tikixtajtoltiskej toni mochiuak uan akoni kichiuak.