TLAXELOL 1

Peua ijkuak otlachijchijkej uan tlami ijkuak omochi Apachiuilistli

¿Akin okichijchi iluikak uan Tlaltikpak? ¿Akin okichijchi Tonaltsin, Metstli, sitlalmej uan nochi tlen onka itech Tlaltikpak? Biblia techiluia tlen melauak ijkuak kijtoa toTajtsin Dios ye akin okichijchi nochi tlen onka. Ik non, nin amochtli peua techtlapouia ken okichijchijkej nochi tlen onka.

Timomachtiaj ken toTajtsin Dios achto okinchijchi espíritus ijkon ken ye. Yejuan okatkaj ángeles. Uan Tlaltikpak okichijchi pampa tlaltikpaktlakamej ken tejuan. Ik non, toTajtsin Dios okichijchi tlakatl uan siuatl tlen omotokayotiayaj Adán uan Eva, uan okintlali itech se kualtsin xochitlali. Maski ijkon, yejuan amo okitlakamatkej toTajtsin Dios, ik non, ayakmo uelis yoltoskiaj.

Ijkuak toTajtsin Dios okichijchi Adán uan ijkuak omochi Apachiuilistli, opanokej 1,656 xiuitl. Itech nochi non kauitl miakej tlaltikpaktlakamej okatkaj amo yolkualmej. Itech iluikak okatkaj espíritus tlen amo ueli moitaj, Satanás uan amo kuali iejekauan. Itech Tlaltikpak okatkaj Caín uan oksekimej tlaltikpaktlakamej tlen amo yolkualmej, noijki okatkaj tlakamej tlen okipiayaj miak chikaualistli. Maski ijkon, noijki okatkaj tlaltikpaktlakamej yolkualmej... Abel, Enoc uan Noé. Itech nin Tlaxelol SE, tiktlajtoltiskej itech nochtin ninmej tlaltikpaktlakamej uan tlen opanok.