ONTHELE YO 1
Tunde Pokulingwa Kuovipuka alo Pombila Onene
Opi kuatuka eulu noohi? Opi kuatuka ekumbi, nohanyi, no nonthungululu, novipuka ovikuavo ovinyingi kombanda yoohi? Ombimbiliya ituavela ekumbululo liotyotyili, putyina itupopila okuti ovipuka ovio aviho vialingwa na Huku. Ngotyo, omu-kanda wetu uhimbika nomahipululo Ombimbiliya kombinga yokulingwa kuovipuka aviho.
Matulilongesa okuti, Huku walinga tete ovanthu vopaspilitu velifua nae muene. Ovanthu ovo vatiwa onoandyu. Anthi oohi yalingwa pala ovanthu ngonthue. Ngotyo, Huku walinga omulume nomukai vatiwa Andau na Eva, evepake motyikunino tyimue otyiwa. Anthi Andau na Eva kavatavelele ku Huku. Moluotyo, ankho kavatokalele vali okutualako nomuenyo.
Tunde puetyi Andau alingwa alo Pombila onene, palamba 1.656 omanima. Mokuenda kuomuvo oo, kuakala ovanthu ovanyingi onondingavivi. Keulu, ankho kuali ovanthu vopaspilitu, Satanasi no noandyu mbae onombi. Pano pohi, ankho pali Kaim novanthu ovakuavo onondingavi, okukutikinyamo ovalume vamue ovanene ankho vokuna ononkhono ononene. Tupu pano pohi ankho pali ovanthu onondalawa, Abel, na Enoke, na Noe. Monthele YOTETE matutangemo kombinga yovanthu ovo aveho novipuka viapitako.
MONTHELE EI
EHIPULULO 1
Huku Uhimbika Okulinga Ovipuka
Ovipuka viapopiwa momukanda wa Gênesis viapepuka ovinoñgonoka, novana vala vevinoñgonoka liwa.
EHIPULULO 2
Otyikunino Tyimue Otyiwa
Omukanda wa Gênesis upopia okuti Huku walinga otyitaka tyo Endene atyikala omphangu imwe ongwa. Huku ankho uhanda ovanthu vakalamo vakale nehambu.
EHIPULULO 3
Omulume Wotete Nomukai Wotete
Huku watunga ovo Andau na Eva evepake motyitaka tyo Endene. Ovo vali ovalinepi vo tete.
EHIPULULO 4
Omokonda Yatyi Vatelwa Motyikunino
Omukanda wa Gênesis upopia okuti ovo Andau na Eva valinga onkhali, avatewa motyitaka tyo Endene.
EHIPULULO 5
Omuenyo Wovitateka Uhimbika
Etyi ovo Andau na Eva vatewa motyitaka tyo Endene, avakala novitateka ovinyingi. Ine vetavelele umwe Huku, ñgeno ovana vavo kavakalele novitateka.
EHIPULULO 6
Omona Umue Ondalawa, No Mukuavo Ondingavivi
Ehipululo tuvasa momukanda wa Gênesis lipopia ovo Kaim na Abele, litulongesa etyi tuna okukala, nonontheto mbumwe mbehekahi nawa tuna okulipola.
EHIPULULO 7
Omulume Umue Wakola Omutima
Ovipuka Enoke alingile, vilekesa okuti ove upondola okukala omunthu ulinga oviwa, namphila ava mukala navo valinga ovipuka ovivi.
EHIPULULO 8
Omakihi Pano Pohi
Omukanda wa Gênesis okapitulu 6, ipopia okuti etyi pakala ovanthu avahimbika okulinga ovipuka ovivi. Vamwe ankho valinga umwe ovivi, Omakihi atiwa ono Nefilisi, vatyitwa nonoandyu mbatundile keulu.
EHIPULULO 9
Noe Utunga Owato
Noe no vomeumbo liae vahupile Kombila Onene mokonda ankho vetavela Huku, namphila ovanthu ovakwavo ankho vehetavela Huku.
EHIPULULO 10
Ombila Onene
Ovanthu ankho valinga omukwele Noe tyina evepopila Ondaka ya Huku. Mahi etyi Ombila Onene yahimbika okuloka, avehemulingi vali omukwele! Soka oñgeni owato wahupisa Noe, no vomeumbo liae, novinyama ovinyingi-nyingi.
