Ekicweka 1

Eby’Okuhangwa Okuhika aha Mwegyemure

Eiguru n’ensi bikaruga nkahi? Eizooba, okwezi n’enyonyoozi, hamwe n’ebintu bingi ebiri omu nsi bikabaho bita? Baibuli neeheereza eky’okugarukamu ekihikire ku erikugira ngu bikahangwa Ruhanga. N’ahabw’ekyo, ekitabo kyaitu nikitandika n’ebitebyo by’omu Baibuli ebirikukwata aha kuhangwa.

Nitwega ngu ebihangirwe bya Ruhanga eby’okubanza, bakaba bari abantu ab’omwoyo abari nka we. Bakaba bari baamaraika. Kwonka ensi ekahangirwa abantu nkaitwe. Atyo Ruhanga yaahanga omushaija n’omukazi abarikwetwa Adamu na Haawa kandi yaabata omu musiri murungi munonga. Kwonka bakagomera Ruhanga kandi baafeerwa obugabe bw’okuguma bahuriire.

Okuruga aha kuhangwa kwa Adamu okuhitsya aha Mwegyemure rugambwa, hakahinguraho emyaka 1,656. Omu bunaku obu, hakaba hariho abantu baingi babi. Omu iguru, hakaba hariyo abantu ab’omyoyo abatarikureebwa, nibo Sitaane hamwe na baamaraika be ababi. Omu nsi, hakaba harimu Kaini hamwe n’abandi bantu baingi babi, otwariiremu n’abantu b’amaani abatari ba buriijo. Beitu kandi hakaba hariho n’abantu abarungi omu nsi​—⁠Abeeli, Enoka, na Noa. Omu Kicweka ky’OKUBANZA, niitwija kushoma ebirikukwata aha bantu aba hamwe n’ebyabaireho.