Noea mai te au rangi e te enua? Akapeea te ra, te marama, te au etu, e te au mea ravarai i runga i te enua i te tupu anga mai? Te oronga maira te Pipiria i te pauanga tika i te karanga anga e, na te Atua ratou i anga. No reira, akamata ta tatou puka no te au tua Pipiria ki te akamataanga o te au mea angaia.

Te au mea mua ta te Atua i anga, ta tatou ka kite mai, ko te au mea ora vaerua mei iaia rai. E au angera ratou. Inara kua angaia te enua no te tangata mei ia tatou rai. No reira kua anga te Atua i te tangata e te vaine tei tapaia te ingoa ko Adamu e Eva, e kua tuku ia raua ki roto i tetai kainga manea. Inara kare raua i akarongo ana ki te Atua, e kua ngere i te tikaanga kia ora ua atu.

Mei to Adamu angaia anga e tae atu ki te Vaipuke maata, e 1,656 mataiti. I roto i taua tuatau ra, maata te aronga kino i ora ana. I runga i te rangi, e au mea ora vaerua kitea koreia te noo ra, ko Satani e tana au angera kino. I runga nei i te enua, ko Kaina e te au tangata kino e manganui, kapiti mai tetai au tangata ririnui tuke ake rai. Tera ra e au tangata meitaki katoa tetai i runga nei i te enua​—ko Abela, Enoka e Noa. I roto i te Tuanga TAI ka tatau tatou no runga i teia au tangata pouroa e te au mea i tupu.