Maholimo le lefatše li tsoa hokae? Letsatsi, khoeli le linaleli le lintho tse ling tse ngata tse lefatšeng li bile teng joang? Bibele e fana ka karabo e nepahetseng ha e re li bōpiloe ke Molimo. Kahoo buka ea rōna e qala ka lipale tsa Bibele tse buang ka pōpo.

Re ithuta hore Molimo o qalile ka ho bōpa batho ba moea ba batlang ba tšoana le eena. O bōpile mangeloi. Empa lefatše lona le ne le bōpetsoe batho ba kang rōna. Kahoo Molimo o ile a etsa monna le mosali ba bitsoang Adama le Eva ’me a ba beha serapeng se setle. Empa ha baa ka ba mamela Molimo ’me kahoo ba lahleheloa ke tokelo ea ho tsoela pele ba phela.

Ka kakaretso ho nkile lilemo tse 1 656, ho tloha ha Adama a bōptjoa ho isa Moroallong o moholo. Nakong eo ho ile ha phela batho ba bangata ba babe. Leholimong e ne e le batho ba sa bonahaleng ba moea, e leng Satane le mangeloi a hae a mabe. Lefatšeng ho ne ho e-na le Kaine le batho ba bang ba bangata ba babe, ho akarelletsa banna ba bang ba matla ka tsela e sa tloaelehang. Empa le batho ba molemo ba ne ba le teng lefatšeng—Abele, Enoke le Noe. Karolong ea PELE re tlil’o bala ka batho bana kaofela le ka lintho tse ling tse etsahetseng.