Aibo abunio akuj ka akwap? Epone bo ani abunio akolong, elap ka acerin, ido aimoriarit iboro luipu kotoma akwap? Ijaikinit Ebaibuli abongokinet na abeit ne ebalar ebe Edeke ngesi asubi kes. Aso egeuni etabo wok kede akiro nuitetemi Ebaibuli nuikamunitos asubio.

Isisiauni oni ebe isuban lusodit luka Edeke, araasi itunga luimooyon kwape kangesi. Araasi imalaikan. Konye akwap asubunitai kanuka itunga kwape kaoni. Aso abu Edeke osub ekilokit ka aberu luanyaritai Adam ka Keba kosodi apikakin kes toma omanikor loibus. Konye apotu komwangata Edeke ido kotwakiasi apedor na aiyatakinit aijar.

Ageun ne asubunere Adam kiton Akalele nati, erai apak na ikar 1,656. Kotoma apak na, iboitos itunga luipu luaroko. Kotoma akuj, ajaasi itunga lumoyoon lumam atakanete, Satan ka ikemalaikan luarokok. Kotoma akwap, ajai Kain ka icetunga luipu luaroko, kimoriarite icetunga luadepara agogongu kec. Konye ajaasi icetunga luajokuka toma akwap—Abel, Enok ka Noa. Kotoma Atutubet NASODIT, ibuni oni aisiom nuikamunitos itunga luu kere ka akiro lueswamasi.