KONGA 1
Mei he fakatupú ‘o a‘u ki he Lōmakí
Na‘e hoko mei fē ‘a e ngaahi langí mo e māmaní? Na‘e hoko fēfē mai ‘a e la‘ā, māhina, mo e ngaahi fetu‘ú, pea pehē ki he ngaahi me‘a lahi ‘i he māmaní? ‘Oku ‘omai ‘e he Tohitapú ‘a e tali mo‘oní ‘i he‘ene pehē na‘e fakatupu ‘a kinautolu ‘e he ‘Otuá. Ko ia ‘oku kamata‘aki ‘etau tohí ni ‘a e ngaahi talanoa faka-Tohitapu ‘o fekau‘aki mo e fakatupú.
‘Oku tau ako ‘o ‘ilo ko e ‘uluaki ngaahi fakatupu ‘a e ‘Otuá ko e fa‘ahinga laumālie ‘o hangē ko iá. Ko e kau ‘āngeló ia. Ka na‘e fakatupu ‘a e māmaní ma‘á e kakai ‘o hangē ko kitautolú. Ko ia na‘e ngaohi ‘e he ‘Otuá ‘a e tangata mo e fefine na‘e fakahingoa ko ‘Ātama mo ‘Ivi pea tuku kinaua ki ha ngoue faka‘ofo‘ofa. Ka na‘á na talangata‘a ki he ‘Otuá pea mole ai ‘a e totonu ke hokohoko atu ‘i he mo‘uí.
Ko e vaha‘a taimi mei he fakatupu ‘o ‘Ātamá ‘o a‘u ki he fu‘u Lōmakí, na‘e fe‘unga mo e ta‘u ‘e 1,656. Lolotonga ‘a e taimi ko ‘ení na‘e mo‘ui ai ha kakai kovi tokolahi. ‘I hēvani, na‘e ‘i ai ‘a e fa‘ahinga laumālie ta‘e hā mai, ko Sētane mo ‘ene kau ‘āngelo kovi. ‘I he māmaní, na‘e ‘i ai ‘a Keini mo e kakai kovi tokolahi kehe, kau ai mo e kau tangata mālohi angakehe. Ka na‘e toe ‘i ai foki mo e kakai lelei ‘i he māmaní—ko ‘Ēpeli, ‘Īnoke mo Noa. ‘I he Konga ‘ULUAKÍ te tau lau ai ‘o kau ki he kakai mo e ngaahi me‘a kotoa ko ‘eni na‘e hokó.
‘I HE KONGA KO ENÍ
TALANOA 1
Na‘e Kamata ‘e he ‘Otuá ke Ngaohi ha Ngaahi Me‘a
Ko e talanoa ‘i he Sēnesí ki he fakatupú ‘oku mahino mo fakamānako—‘o a‘u ki he fānau īkí.
TALANOA 2
Ko ha Ngoue Faka‘ofo‘ofa
Fakatatau ki he Sēnesí, na‘e ngaohi ‘e he ‘Otuá e ngoue ko ‘Ītení ko ha feitu‘u makehe. Na‘e loto e ‘Otuá ke faka‘ofo‘ofa e māmaní kotoa ‘o tatau mo e ngoué ni.
TALANOA 3
Ko e ‘Uluaki Tangatá mo e Fefiné
Na‘e fakatupu ‘e he ‘Otuá ‘a ‘Ātama mo ‘Ivi pea tuku kinaua ki he ngoue ‘o ‘Ītení. Na‘á na hoko ko e fuofua ongo me‘a malí.
TALANOA 4
Ko e ‘Uhinga Na‘e Mole Ai Hona ‘Apí
‘Oku tala mai ‘e he tohi ‘a Sēnesí ‘a e founga na‘e mole ai e mu‘aki palataisí.
TALANOA 5
Na‘e Kamata ‘a e Mo‘ui Faingata‘a‘ia
‘I tu‘a mei he ngoue ko ‘Ītení, ‘oku fā‘ele‘i ai e fānau ‘a ‘Ātama mo ‘Iví. Koe‘uhi ko e talangata‘a ‘enau ongo mātu‘á ki he ‘Otuá, kuo mamahi mo faingata‘a‘ia ai e kotoa ‘enau mo‘uí.
TALANOA 6
Ko e Foha Lelei, mo e Foha Kovi
Ko e talanoa kia Keini mo ‘Ēpelí, ‘oku lēkooti ‘i he Sēnesí, ‘oku ako‘i mai ai ‘a e fa‘ahinga kakai ‘oku totonu ke tau hoko ki aí—mo e tō‘onga ke liliu ki mu‘a ke fu‘u tōmuí.
TALANOA 7
Ko ha Tangata Loto-To‘a
Ko e fa‘ifa‘itaki‘anga ‘a ‘Īnoké ‘oku hā mei ai ‘e lava ke ke fai ‘a e me‘a totonú, neongo e faikovi ‘a e kakai takatakaí.
TALANOA 8
Kau Saiāniti ‘i he Māmaní
‘Oku hā ‘i he Sēnesi vahe 6 ‘o kau ki he kau saiāniti na‘á nau fakamamahi‘i e kakaí. Na‘e ui kinautolu ko e kau Nefilimi, ko e fānau e kau ‘āngelo ne mavahe mei hēvani pea mo‘ui ko ha tangata.
TALANOA 9
Na‘e Fa‘u ‘e Noa ‘a e ‘A‘ake
Na‘e hao ‘a Noa mo hono fāmilí he Lōmakí koe‘uhí na‘a nau talangofua ki he ‘Otuá neongo e ‘ikai fanongo ‘a e ni‘ihi.
TALANOA 10
Ko e Fu‘u Lōmakí
Na‘e kata‘i ‘e he kakaí ‘a e pōpoaki fakaefakatokanga ‘a Noá. Ka na‘e ‘ikai ke nau kata ‘i he tō mai ‘a e lōmakí mei hēvaní! Ako ki hono fakahaofi ‘e he ‘a‘ake ‘o Noá ‘a Noa, hono fāmilí mo e fanga manu tokolahi.
