XETʼAN 1
Ja kʼe kujlajuk ja jastik junuki man ja niwan Bʼutʼ Jaʼi
¿Wan maʼ xa naʼa bʼa jak ja satkʼinali soka Luʼumi? ¿Maʼ skʼulan ja Kʼaʼuji, ja Luna, ja kʼanali soka jastik junuk ay bʼa Luʼumi? Ja Biblia wa xyala ja smeranili yajni wa xyala yeʼn naka skʼulan ja Dyosi. Ja yuj ja juʼun it wa xkʼe xchol jastal kʼe kʼulaxuk ja jastik junuk wa xkilatiki.
Oj awil ja bʼajtan jastik junuk skʼulan ja Dyosi ikʼ ason jumasaʼ jastal yeʼna. Ja yeʼnleʼi anjele. Pe ja Luʼumi kʼulaji bʼa tiʼ oj ajyuk ja ixuk winikeʼi. Ja yuj ja Dyosi skʼulan ja winik sbʼiʼil Adán soka ixuk sbʼiʼil Eva sok ti yaʼa bʼa jun tsamal kʼachinubʼ. Pe ja yeʼnleʼi skʼokowe ja smandar ja Dyosi sok xchʼayawe ja sakʼanile bʼa tolabida.
Spetsanil ja loʼil yiʼojan ja xetʼan it man kʼulaji ja Adani sok man jak ja niwan Bʼutʼ Jaʼi ekʼ bʼa jun 1,656 jabʼil. Bʼa spetsanil ja jabʼilik jaw ajyi sakʼan matik wa skʼulan ja bʼa mi lekuki. Ja bʼa satkʼinali, tiʼ ajyi ja Satanasi soka yanjel jumasaʼ mixa lekuk ja skʼujoleʼi. Jaxa bʼa Luʼumi, tiʼ ajyi ja Caini sok tuk ixuk winike wa skʼulane ja bʼa mi lekuki, ja bʼa yeʼnleʼi tini ajyi jujuntik winike jel niwanik sok jel ja yipeʼi. Pe cha ajyini matik wa skʼulane ja bʼa leki; tey ja Abeli, ja Enoki soka Noeji. Ja bʼa XETʼAN 1 oj akʼumuk jastal ekʼ ja sakʼanileʼi soka jastik junuk ekʼ ja bʼa skʼakʼujileʼi.
JA BʼA XETʼAN IT
LOʼIL 1
Dyos wa xkʼe skʼuluk ja jastik junuki
Ja loʼilik yiʼojan ja Génesis sbʼaja jastal kʼe kujlajuk ja jastik junuki jel tsamal sok chomajkil sbʼaja yal untiki.
LOʼIL 2
Jun tsamal kʼachinubʼ
Jastalni wa xyala ja Génesis, ja Dyosi skʼulan ja kʼachinubʼ bʼa Edén jun lugar jel chaʼanyabʼal. Ja Dyos wa sk’ana yibʼanal ja luʼumi apaxuk jastal ja kʼachinubʼ it.
LOʼIL 3
Ja bʼajtan winik soka bʼajtan ixuki
Ja Dyos skʼulan ja Adán soka Eva sok yayile ja tsamal kʼachinubʼ bʼa Edén. Sok yeʼnleni kʼotye ja bʼajtan nupanumi.
LOʼIL 5
Wa xkʼe jun sakʼanile jel wokol
Ja Adán soka Eva jel kʼe ajyuk yujile wokol ja yajni mixa teyuke bʼa yojol ja kʼachinubʼ bʼa Edén. Lek skʼuʼukexta ja Dyosi, ja sakʼanileʼi gustoni oj ajyuk soka bʼa yuntikileʼi.
LOʼIL 6
Jun lekil kerem, sok june miyuk
Ja loʼil bʼa Caín soka Abel wa xtax bʼa Génesis wa sjeʼakitik jas tikʼe ixuk winik oj ajyukotik sok jas tikʼe modoʼal tʼilan oj jtukbʼestik.
LOʼIL 7
Jun winik mix xiwi
Ja sjejel bʼa Enoc wa sjeʼa ojni bʼobʼ ajyan toj, anima ja ixuk winik sjoybʼunejotiki wa skʼulane ja bʼa mi lekuki.
LOʼIL 8
Niwak winik ja bʼa Luʼumi
Génesis skapituloʼil 6 wa xcholo sbʼaja niwak winik bʼa smilawe ja ixuk winiki. Sbʼiʼilane nefilim sok jani state ja anjelik koyekon bʼa satkʼinali sok ajyiye sakʼan jastal ixuk winik ja bʼa luʼumi.
LOʼIL 9
Noé wa skʼulan ja arka
Ja loʼil bʼa Biblia wa xtax bʼa Génesis wa sjeʼakitik jastal ja Noé soka spamilya kanye sakʼan ja bʼa niwan butʼ jaʼi. Ja yeʼnle skʼuʼane ja Dyos ama ja tuk jitsan ekʼele aljiyabʼye mini skʼuʼane.
LOʼIL 10
Ja niwan Bʼutʼ Jaʼi
Ja ixuk winiki stseʼine ja Noé yajni ja yeʼn yala oj jak jun niwan bʼutʼ jaʼ. Pe ja yeʼnle yaʼawekan tsenel yajni yilawe kʼe ya jaʼ. Ila jastal ja arka skʼulan ja Noé skoltay bʼa oj kanuke sakʼan ja yeʼn, ja spamilya soka chanteʼiki.
