¿Niku minkgocha akgapun chu Katiyatni? ¿La tatlawalh Chichini, Papaʼ chu staku, chu amakgapitsi katuwa tuku anan kKatiyatni? Biblia kgalhtinan akxni wan pi xlikana Dios tlawalh tuku anan. Wa xlakata uma kilibrojkan litsukuy takgalhtawakga xalak Biblia xlakata akxni malakatsukinanka.

Kinkawaniyan pi wantuku Dios pulana katlawalh wa espíritus la Dios. Ángeles xwankgonit. Pero Katiyatni tlawalh xlakata nalatamakgoy kristianos la akinin. Wa xlakata Dios tlawalh chixku, xwanikan Adán chu puskat xwanikan Eva chu kawililh kxastlan jardín. Pero xlakan ni kgalhakgaxmatnikgolh Dios chu wa xlakata makgatsankgakgolh xlatamatkan.

Akxni tlawaka Adán asta akxni milh munkaklat litakgatsiy 1,656 kata. Akxni tama kilhtamaku lhuwa xlamakgolh tiku lixkajni xlikatsikgoy. Anta kʼakgapun xwilakgolh espíritus, Satanás chu xʼángeles tiku lixkajni likatsikgoy. KKatiyatni xlama Caín chu lhuwa tiku lixkajni xlikatsikgoy, chu amakgapitsi lakchixkuwin tiku lu tanu xwankgonit, ni la amakgapitsin xlakata lu lakgtliwakga xwankgonit. Pero unu kKatiyatni na latamakgolh tiku tlan xlikatsikgoy... Abel, Enoc chu Noé. Anta unu KXLIPULAKTUM nalikgalhtawakgayaw xlakata tama kristianos chu nakatsiyaw tuku lalh.