1 Ndaa

Ra bizulú Dios bizáʼ hasta Nisaguié naroʼbaʼ

De paraa beeda guibáʼ ne Guidxilayú. Ximodo guyáʼ Gubidxa, Elabeeu ne ca beleguí (estrella) ca, ne zaqueca guiráʼ xixé ni nuu lu Guidxilayú riʼ. Biblia riníʼ ni dxandíʼ ora na de que Dios bizáʼ guiráʼ cani. Ngue runi libru stinu riʼ la? ruzuluneni historia ni zeeda ndaaniʼ Biblia ni caníʼ ximodo guyáʼ cani.

Zazíʼdinu de que cani bizáʼ Dios primé nga binni de espíritu casi laabe. Nácacabe ángel. Peru Guidxilayú riʼ guyáʼ ni para binni casi laanu. Ngue runi bizaʼbe hombre ne gunaa, lácabe Adán ne Eva ne guluube laacaʼ ndaaniʼ ti jardín sicarú. Peru laacaʼ qué nuzuubacaʼ stiidxaʼ Dios ngue runi biníticaʼ derechu de nibánirucaʼ.

Dede dxi guyáʼ Adán hasta Nisaguié roʼbaʼ que la? biaʼsi gudiʼdiʼ ti mil xhoopaʼ gayuaa cincuenta y seis iza. Ca dxi ca bibani stale binni qué iquiiñeʼ. Guibáʼ guyuu binni de espíritu, Binidxabaʼ ne ca ángel malu stiʼ. Ne lu Guidxilayú riʼ la? guyuu Caín ne xcaadxi binni qué iquiiñeʼ, ládecabe guyuu caadxi hombre nabé gadxé laacaʼ purtiʼ jma nadípacabe que xcaadxi binni. Peru laaca guyuu binni nachaʼhuiʼ lu Guidxilayú riʼ: Abel, Enoc ne Noé. Lu 1 NDAA riʼ la? zadúʼndanu de ca binni riʼ ne cani guca.