¿Ximod bidxin góc guibá né Gudxlio? ¿Ximod goyaʼ govitz, beʼo né vitzón né xidal cós ni noʼ ló Gudxlio? Biblia racapy tzaay órni raníni que Dios bisaʼ guiráni. Por ngú, libro reʼ rasaló né historias ni sieed ló Biblia ni raniʼ ximod bisaʼ Dios guirá ndeʼ.

Rasuidyno que ni Dios primer bisaʼ ngú buñ xomod láabu ni diti labúu rabino ni rabés lainy guibá. Gocyibu ángeles. Per Gudxlio reʼ Dios bisaʼ láani par buñgudxlio xomod lóono. Por ngú, Dios bisaʼ primer buñguieeu ni góc laa Adán né primer buñgonaʼ ni góc laa Eva né Dios goloʼ layibu lainy toib lagary sacroyen. Per layibu diti bisobbu Dios né bisnityibu de guibanyibu tipzó.

Dzú ni bisaʼ Dios Adán hasta dzú ni bieed guiérodann reʼ goduidy 1,656 íz. Dzúcu bibany xidal buñ mal. Ruc lainy guibá bibany buñ ni diti labúu rabino, layibu Buñdzab né ángeles ni góc toibsi ni buny pór cós mal. Ló Gudxlio reʼ bibany Caín, xidal buñ mal, né goyoʼ buñxiblo ni diti góc xomod lóono. Per láaca goyoʼ buñtzay ló Gudxlio. Xomod Abel, Enoc né Noé. Historias de Midid TOIB guisuidyno de guirá buñ reʼ né xí ni góc dzúcu.