Lubanga Ocako Yubo Jami
Ododo 1
Lubanga Ocako Yubo Jami
JAMI ducu mabeco ma watye kwede a ki bot Lubanga. En oyubo ceng wek piny obed maleng i dyeceng, dwe ki lakalatwe wek dero obed tyen i dyewor. Ci Lubanga oyubo lobo pi wan me kwo iye.
Ento ceng, dwe, lakalatwe ki lobo pe gubedo jami mukwongo ma Lubanga oyubo. In ingeyo gin mukwongo? Lubanga okwongo yubo jo ma cal ki en. Pe watwero neno jo magi, kit macalo pe watwero neno Lubanga. I Baibul jo magi kilwongogi ni lumalaika. Lubanga oyubo lumalaika me bedo kacel kwede i polo.
Lamalaika ma Lubanga okwongo yubo onongo dok pat tutwal. En obedo Wod pa Lubanga mukwongo, dok en otiyo gin ki Wonne. En okonyo Lubanga me yubo jami mukene ducu. En okonyo Lubanga me yubo ceng, dwe, lwak lakalatwe ki lobowa-ni bene.
Lobo onongo tye nining i kare meno? I acakki ngat mo onongo pe twero kwo i lobo. Gin mo onongo peke kono ka nam acel madit me pii ma oumo wi ngom ducu. Ento Lubanga onongo mito ni dano gukwo i lobo. Pi meno en ocako yubo jami piwa. En otimo gin ango?
Mukwongo, dero onongo mitte i lobo. Pi meno Lubanga oyubo dero ma a ki i ceng me ryeny i wi lobo. En oyubo wek dyewor ki dyeceng obed tye. I nge meno Lubanga omiyo ngom okatti malo i wi pii me nam.
I acakki gin mo onongo pe i ngom. Ngom onongo nen calo cal ma ineno kany-nyi. Ature nyo yadi nyo lee mo onongo pe. Kadi rec bene onongo peke i nam. Lubanga onongo pud tye ki tic mapol me atiya me yubo lobo wek obed maber adada pi dano ki lee me kwo iye.
