Maana Fɔlɔ

Ala ye fɛnw dali daminɛ

FƐN ɲuman minnu b’an bolo, olu bɛɛ bɔra Ala de yɔrɔ. A ye tile da walisa an ka yeelen sɔrɔ ni dugu jɛra. A ye kalo ni dolow da walisa an ka yeelen dɔ sɔrɔ ni su kora. Ala ye dugukolo da walisa an ka balo a kan.

Nka, Ala ye fɛn fɔlɔ minnu da, olu ma kɛ tile, kalo, dolow ni dugukolo ye. I b’a dɔn a ye fɛn fɔlɔ minnu da wa? Ala fɔlɔla ka mɛlɛkɛw da. An tɛ se ka olu ye, i n’a fɔ an tɛ se ka Ala yɛrɛ ye cogo min na. Ala ye mɛlɛkɛw da walisa olu ka ɲɛnamaya kɛ ale fɛ sankolo la.

Ala ye mɛlɛkɛ fɔlɔ min da, o tun ye mɛlɛkɛ kɛrɛnkɛrɛnnen de ye. Ikomi ale tun ye Ala ka danfɛn fɔlɔ ye, a kɛra i ko a denkɛ fɔlɔ. O de y’a to a welela ko Ala denkɛ fɔlɔ. Ale ni Ala ye baara kɛ ɲɔgɔn fɛ, tuma min na Ala ye tile, kalo, dolow, dugukolo ani fɛn tɔw bɛɛ da.

Dugukolo tun bɛ cogo di o waati la? Mɔgɔ si tun tɛ se ka balo dugukolo kan. Fɛn fosi tun tɛ yen. Jiw tun ye a yɔrɔ bɛɛ datugu. Nka, Ala tun b’a fɛ mɔgɔw ka balo dugukolo kan. O la sa, a ye kow labɛnni daminɛ anw kosɔn. A ye mun kɛ?

Dugukolo mago tun bɛ yeelen de la fɔlɔ. O la sa, Ala y’a kɛ yeelen min bɛ bɔ tile la, o ka se ka na dugukolo kan. A ye cogoya kɛ walisa su bɛ kɛ ani tile bɛ kɛ. O kɔfɛ, Ala y’a kɛ dugukolo yɔrɔ dɔ ka poyi ka bɔ ji cɛma.

O tuma na, fɛn fosi tun tɛ dugukolo kan. A tun bɛ i ko ja b’a jira cogo min na yan. Filɛru, walima jiri, walima bagan si tun tɛ yen. Hali jɛgɛ kelen tun tɛ jiw la. Baara camanba tun bɛ Ala bolo ka kɛ, walisa dugukolo ka kɛ sigiyɔrɔ cɛɲumanba ye baganw ni hadamadenw kama.

Jeremi 10:12; Kolosekaw 1:15-17; Jenɛse 1:1-10.