BELA ibmar nuegana Babdummadgi daniggi. Babdummad imasa Dad naidi, ibgine negmee imaggega, geb Nii geb niisgwamardi muddiggidba negmee imaggega. Geb Nabbaneg imasbali anmar egi gudiguega.

Ar Dad naidi, Nii, niisgwamala geb Nabbanega, Babdummad we ibmar inso imassulid. ¿Be wisi ibu inso imasa? Dulemar egimalad insogi. Anmar geg we dulemar dagge, ar igi anmar geg Babdummad dagmoga. Biblia dina ángelmarye we dulemar onugsae. Babdummadi ángelmar obinyisa nibneggi ebo gudisamalaga.

Babdummad ángel gebe obinyisadi bamalad bogwa aggala. We, Babdummad Massi gebe saglaginedi, geb na e Bab bogwa arbasa. Babdummad bendasa bela ibmar bamalad imaggedgi. Babdummad bendasa Dad naid imaggedgi, geb Nii, niisgwamar, geb anba anmar Nabbaneg imaggedgi arbasbali.

Aa unni Nabbaneg, ¿igiinsunna? Gebe saglaunni Nabbaneggi geg dulemar gudiguena. Ar unnila dermar maddabii nainad. Ar Babdummad dina abegenad Nabbaneggi dulemar gudigued. Ar aagala, anmarga Nabbanega nudaggalid. ¿Ibu imasa?

Gebeunni, Nabbaneggi negmee gued abelegena. Degsoggua, Babdummad imasa Dada Nabbaneg mee saedi. Agala negibgin guddaed, geb negmuddig guddabalid. Geb sorbali dermar madda dummad naidgi, binnabinna negodingusa, negadse noedse.

Gebe saglaunni, nabbagi ibmar saddena. Igi wegi sobarnai be dagge, weyob daglegena. Duddumar saddena, sabbimar saddena, anba ibmar durgan saddemarbalina. Dermar gine uamar saddebalina. Babdummad yeer arbaed niggusa, nabir ibmar durgana Nabbaneggi nued gudigumalaga, geb dulemala nued Nabbaneggi gudigumarmoga gala.