FƐƐN ɲuman minw bɛɛ b’an fɛ, Ala lo ye u bɛɛ di an ma. A ye tile dan walisa a ka yeelen bɔ an ye tilefɛ, ani ka kalo ni lolow dan walisa an ka yeelen sɔrɔ sufɛ. A ye dugukolo fana dan an kosɔn an ka sigi a kan.

Nka tile, kalo, lolow ani dugukolo ma kɛ Ala ka danfɛn fɔlɔw ye. Ala kɔnna ka mun lo dan? Yala i b’o lɔn wa? Ala kɔnna ka mɔgɔ dɔw dan minw be i ko ale yɛrɛ. An tɛ se k’o mɔgɔw ye, i ko an tɛ se ka Ala ye cogo min na. Bibulu be o mɔgɔw weele ko mɛlɛkɛw. Ala ye mɛlɛkɛw dan walisa u ka ɲɛnamaya kɛ n’ale ye sankolo la.

Ala ye mɛlɛkɛ fɔlɔ min dan, ale lɔyɔrɔ tun ka bon kosɔbɛ. Ale kɛra Ala Dencɛ fɔlɔ ye, ani a ye baara kɛ n’a Faa ye. A ye Ala dɛmɛ ka fɛɛn tɔɔw bɛɛ dan. A ye Ala dɛmɛ ka tile, kalo, lolow ani dugukolo fana dan.

Dugukolo tun be cogo di o wagati la? A daminɛ na, mɔgɔ si tun tɛ se ka ɲɛnamaya kɛ dugukolo kan. Kɔgɔjiba dɔrɔn lo tun be yen ka dugukolo yɔrɔ bɛɛ fa. Nka, Ala tun b’a fɛ mɔgɔw ka ɲɛnamaya kɛ dugukolo kan. O kama, a y’a daminɛ k’a labɛn an kosɔn. A ye mun lo kɛ do?

Dugukolo mako tun be yeelen lo la fɔlɔ. O kama, Ala y’a to tile ka yeelen bɔ dugukolo kan. A y’o kɛ walisa suu ka ko ani dugu ka gwɛ. O kɔ, Ala y’a kɛ dugukolo bɔra kɔgɔji la.

A daminɛ na, foyi si tun tɛ dugukolo kan. A tun be i ko i ɲɛɛ be jaa min na ten. Filɛruw, yiriw ani bɛgɛnw si tun tɛ yen. Hali jɛgɛ si tun tɛ yen kɔgɔjiw kɔnɔ. Baaraba bele tun be Ala fɛ ka dugukolo kɛ yɔrɔ cɛɲumanba ye walisa mɔgɔw ni bɛgɛnw ka ɲɛnamaya kɛ a kan.