E VU mai vua na Kalou na ka vinaka kece eda taukena. A bulia na matanisiga me solia vei keda na rarama ena siga, na vula kei na kalokalo ena bogi. Sa qai bulia na vuravura na Kalou meda tiko kina.

Ia na matanisiga, vula, kalokalo, kei na vuravura e sega ni imatai ni ka a bulia na Kalou. O kila se cava a buli e liu? Na Kalou a bulia e liu e so na ka bula era vakataki koya. Eda sega ni raici ira, me vaka ga nida sega ni raica na Kalou. Ena iVolatabu era vakatokai mera agilosi. Era a buli na agilosi mera tiko vata kei na Kalou mai lomalagi.

Na imatai ni agilosi a bulia na Kalou e duatani duadua. E nona ulumatua, e dau cakacaka vata kei koya. A veivuke o koya ena kena buli na matanisiga, vula, kalokalo, na noda vuravura, kei na veika tale e so.

A vakacava tu na vuravura ena gauna oya? E sega ni dua na ka e bula rawa kina. Na wasawasa levu e ubia na vanua taucoko, ia e vinakata na Kalou mera bula na tamata e vuravura. Mai vakarautaka sara na vuravura me rawa kina na bula. A cakava vakacava oya?

Taumada a vakacila mai na matanisiga na Kalou me rarama kina na vanua qai vakacila na vula kei na kalokalo ena bogi. Oti sa qai vakavuna na Kalou mera basika mai na dela ni vanua ena wasawasa.

Ena gauna oya a sega ni dua na ka e tu ena dela ni vanua. E vaka sara ga na iyaloyalo o raica toka oqori. E sega tu kina na senikau, vunikau se manumanu. Sega mada ga kina na ika ni wasawasa. E se levu tale tu na cakacaka me na cakava na Kalou mera na taleitaka kina na tamata kei na manumanu na bula e vuravura.