TAQSIṬ TAMEZWARUT

Yebda Ṛebbi ccɣel-​is

AYEN akk yelhan d Ṛebbi i t-​id-​ixelqen. Ixleq-​ed iṭij akken a ɣ-​d-​yefk tafat deg wass, agur d yetran akken a ɣ-​d-​fken tafat deg yiḍ. Ixleq-​ed daɣen lqaɛa akken a nɛic fell-​as.

Lameɛna iṭij, agur, itran akk-​d lqaɛa mačči d lexliqat timezwura n Ṛebbi. Teẓriḍ ihi acu i d-​ixleq di tazwara? D lexliqat icuban ɣur-​es. Ur nezmir ara a tent-​nwali akken ur nezmir ara a nwali Ṛebbi. Deg Wedlis Iqedsen, lexliqat-​agi ţţusemmant lmalayekkat. Ixleq-​itent-​id Ṛebbi akken ad ɛicent yid-​es deg igenni.

Lmelk amezwaru i d-​ixleq Ṛebbi yesɛa azal ameqran. Iḥseb-​it Ṛebbi am mmi-​s amenzu. Yeqdec neţţa d Baba-​s, iɛawen-​it ad ixdem leḥwayeǧ akk nniḍen am yiṭij, agur, itran d lqaɛa-​nneɣ.

Amek i tella lqaɛa imiren-​nni? Di tazwara, ulac win izemren ad iɛic fell-​as. Ur yelli deg-​s wacemma, siwa lebḥeṛ ameqran i gɣummen akal. Lameɛna Ṛebbi yebɣa ad ɛicen yemdanen ɣef lqaɛa. Dɣa yebda iţṣeggim-​iţ ɣef ddemma-​nneɣ. Acu i gexdem?

Di tazwara lqaɛa teḥwaǧ tafat. Ihi, Ṛebbi ixleq-​ed iṭij akken ad yefk tafat i lqaɛa, lameɛna iga ţţawil akken ad yili yiḍ d wass. Umbeɛd, Ṛebbi issufeɣ-​ed akal yellan ddaw lebḥeṛ.

Di tazwara lqaɛa meṛṛa texla. Akken i t-​teţwaliḍ di ţţeswiṛa-​yagi, ur llin ijeǧǧigen, ur llint ttjuṛ, ur llin lḥiwan. Ulac daɣen iḥutiwen (iselman) di lebḥuṛ. Aṭas n ccɣel i mazal a t-​ixdem Ṛebbi, uqbel aţ-​ţuɣal lqaɛa d amkan icebḥen anda ara ɛicen lḥiwan d yemdanen.

Irmiya 10:12; At Kulus 1:15-17; Laṣel n ddunit 1:1-10.