BINTU byonse byawama byo tuji nabyo bifuma kwi Lesa. Walengele juba jitupa kyeya kimye kya mute, ñondo ne tubangabanga kuba’mba bufuku kwikalenga kyeya kyawaina. Kabiji Lesa walengele ntanda amba twikalengapo.

Pano bino juba, ñondo, tubangabanga ne ntanda kechi byo byajinga bintu bitanshi Lesa byo alengele ne. Nanchi wayuka bintu byo atendekejilepo kulenga nyi? Patanshi Lesa walengele bantu bamupasha. Kechi twakonsha kwibamona bano bantu ne, byonkatu byo tubula kumumona Lesa. Mu Baibolo bano bantu batelwa’mba bamalaika. Lesa walengele bamalaika amba bekalenga ne aye mwiulu.

Malaika mutanshi Lesa ye alengele wajinga wapusanako bingi. Wajinga Mwana Lesa mutanshi, kabiji waingijijile pamo na Shanji. Wakwashisheko Lesa kulenga bintu bikwabo byonse. Wakwashishe Lesa kulenga juba, ñondo, tubangabanga ne ino ntanda yo twikalapo.

Nga ntanda pa kyokya kimye yajinga byepi? Mu ntendekelo kafwako wakonsheshe kwikala panopantanda ne. Kechi pajingapo kintu kiji kyonse ne, pa mushiji yense pakumbenetu kalunga ka mema. Bino Lesa wakebelenga bantu kwikala pa ntanda. Onkao mambo, watendekele kwitunengezhezha bintu. Nanchi waubilepo byepi?

Patanshi ntanda yakebewenga kyeya. Onkao mambo, Lesa walengele kyeya kufuma ku juba kusamina pa ntanda. Walengele mu jishinda ja kuba’mba kwikalenga bimye bya bufuku ne bimye bya mute. Kyalondejilepo Lesa waletele mushiji peulu ya mema.

Pa uno mushiji kechi pakijingapo nangwa kintu kimo ne. Pajingatu byonka byo ubena kumona pa kikye kipikichala. Kechi pajingapo maluba nangwa bichi nangwa banyama ne. Kabiji mu kalunga ka mema kechi mwajingapo masabi ne. Lesa wajinga na mwingilo mukatampe wa kulenga ntanda kwikala yawama ya kwikalapo banyama ne bantu.