ပူ ၁
ယွၤစးထီၣ်တ့လီၤ တၢ်ဖိတၢ်လံၤတဖၣ် အဂ့ၢ်
တၢ်ဂ့ၤလၢအအိၣ်ဒီးပှၤ တမံၤလၢ်လၢ်န့ၣ် ဟဲလၢယွၤအအိၣ်န့ၣ်လီၤ. ဒ်သိးကဟ့ၣ်တၢ်ကပီၤလၢမုၢ်ဆါအဂီၢ် အဝဲဒၣ်တ့လီၤပာ်ဝဲမုၢ်န့ၣ်လီၤ. ဖဲမုၢ်နၤခါစ့ၢ်ကီး ကန့ၢ်ဘၣ်တၢ်ကပီၤ ဖဲအကြၢးအဘၣ်အဂီၢ် တ့လီၤဝဲ လါဒီးဆၣ်တဖၣ်န့ၣ်လီၤ. လၢပကအိၣ်ကဆိးအဂီၢ် တ့လီၤဃုာ်ဝဲဟီၣ်ခိၣ်န့ၣ်လီၤ.
ဘၣ်ဆၣ်သနာ်က့ မုၢ်, လါ, ဆၣ်တဖၣ် ဒီးဟီၣ်ခိၣ်န့ၣ် တမ့ၢ်တၢ်လၢကစၢ်ယွၤတ့လီၤအဆိကတၢၢ်ဘၣ်. အဆိကတၢၢ်တ့လီၤဝဲမနုၤလဲၣ် နသ့ၣ်ညါဧါ. လၢအဆိန့ၣ်ကစၢ်ယွၤတ့လီၤဝဲ ပှၤလၢအလီၤဂာ်ဒီးအီၤတဖၣ်န့ၣ်လီၤ. ပှၤတဖၣ်အံၤပထံၣ်အီၤလၢ ပမဲာ်တသ့ဘၣ်. ဒ်ပထံၣ်ဘၣ်ယွၤ တသ့အသိးန့ၣ်သၢၣ်. လၢလံာ်စီဆှံပူၤန့ၣ် ပှၤတဖၣ်အံၤ ဘၣ်တၢ်ကိးအီၤလၢ မူခိၣ်ကလူးန့ၣ်လီၤ. ကစၢ်ယွၤန့ၣ် တ့လီၤတ့ၢ်ဝဲမူခိၣ်ကလူးတဖၣ် လၢအကအိၣ်ဒီးအီၤလၢမူခိၣ်န့ၣ်လီၤ.
မူခိၣ်ကလူးလၢ ယွၤတ့လီၤအဆိကတၢၢ်န့ၣ် လီၤဆီဝဲဒိၣ်မးန့ၣ်လီၤ. အဝဲမ့ၢ်ကစၢ်ယွၤအဖိဝဲၢ်ကိလီၤသၢၣ်. အဝဲဒၣ် ဖံးစၢၤမၤစၢၤတၢ်လၢ အပၢ်တ့လီၤတၢ်အဂၤတဖၣ်အခါန့ၣ်လီၤ. ဖဲကစၢ်ယွၤတ့လီၤ မုၢ်, လါ, ဆၣ်တဖၣ် ဒီးဟီၣ်ခိၣ်အခါ အဝဲဒၣ်မၤစၢၤအပၢ်န့ၣ်လီၤ.
ဖဲန့ၣ်အခါ ဟီၣ်ခိၣ်န့ၣ် အက့ၢ်အဂီၤမၤသးဒ်လဲၣ်. လၢအခီၣ်ထံးန့ၣ် ပှၤအိၣ်လၢဟီၣ်ခိၣ်ချၢ တသ့နီတဂၤဘၣ်. ဟီၣ်ခိၣ်ဒီဘ့ၣ်ညါန့ၣ် ပီၣ်လဲၣ်လုာ်ဘၢဃာ်အီၤ, ဒီးအမဲာ်ညါန့ၣ် တၢ်တအိၣ်ဒံးဘၣ်နီတမံၤဘၣ်. ဘၣ်ဆၣ်သနာ်က့ ကစၢ်ယွၤအဲၣ်ဒိးလၢ ပှၤကညီကအိၣ်လၢအလိၤလီၤ. တၢ်န့ၣ်အဃိ အဝဲစးထီၣ်ကတဲာ်ကတီၤတၢ်လၢပဂီၢ်လီၤသၢၣ်. ကစၢ်ယွၤကတဲာ်ကတီၤဝဲဒၣ်ဒ်လဲၣ်.
အဆိကတၢၢ်, ဟီၣ်ခိၣ်န့ၣ် လိၣ်ဘၣ်တၢ်ကပီၤလီၤ. တၢ်န့ၣ်အဃိ ကစၢ်ယွၤဒုးကပီၤထီၣ် မုၢ်အတၢ်ကပီၤ ဆူဟီၣ်ခိၣ်န့ၣ်လီၤ. မၤကဲထီၣ်ဝဲ နံၤဒီးနၤန့ၣ်လီၤ. လၢတၢ်န့ၣ်အလီၢ်ခံ ယွၤမၤကဒီးဝဲ ဒ်ခိကဟဲပၢၢ်ထီၣ်လၢ ပီၣ်လဲၣ်အထံကျါန့ၣ်လီၤ.
လၢအခီၣ်ထံးန့ၣ် တၢ်တအိၣ်နီတမံၤလၢ ခိအဖီခိၣ်ဘၣ်. ဒ်အဖျါလၢတၢ်ဂီၤအံၤအပူၤအသိးန့ၣ်သၢၣ်. ဖီတဖၣ်, သ့ၣ်ထူၣ်တဖၣ်, ဆၣ်ဖိကီၢ်ဖိတဖၣ်စ့ၢ်ကီး တအိၣ်ဘၣ်. လၢပီၣ်လဲၣ်မိၢ်ပှၢ်အပူၤဒၣ်လဲာ် ညၣ်တအိၣ်နီတဘ့ၣ်ဘၣ်. ဆၣ်ဖိကီၢ်ဖိ ဒီးပှၤကညီတဖၣ် အိၣ်ကသ့အဂီၢ် ကစၢ်ယွၤကဘၣ်ကတဲာ်ကတီၤဟီၣ်ခိၣ် အါမးဒံးန့ၣ်လီၤ.