Icisimicisyo 1: BaLesa Batatika Ukulenga Ifintu
FYONSE lukoso ifintu tukwete filifumine kuli baLesa. Balilengele akasuba akatupa ukutuba mu kasuba, ne mwensi ne tubangabanga pakweba’ti tulukukwata ukutuba ubusiku. BaLesa balilengele icalo ukweba’ti fwebo tulukwikalamo.
Pano akasuba, umwensi, utubangabanga ne calo talipo ati efi baLesa batatikilepo ukulenga. Kani webo ulifisi ifi batatikilepo? Mukutatikilapo lukoso baLesa balilengele abantu abali koti nibo. Tekubabonapo, koti nifyenkafilya tatubabonapo baLesa. Mu Baibolo aba abantu balabeta ati inkalamba. BaLesa balilengele inkalamba ukweba’ti balukwikala nasyo kwiulu.
Inkalamba baLesa batatikilepo ukulenga yalilibelele. Yali Mwana umwalalume ibeli lyabo, kabili alipyungile na baWisi. Alyofweleko baLesa ukulenga ifintu fyonse lukoso. Alyofweleko baLesa ukulenga akasuba, umwensi, utubangabanga eli ne calo.
Mba pano ulo icalo calukuboneka koti nindo? Pa kutanga lukoso takwali uwalukwikala pa calo. Takwalipo neli kamo sombi pali isiba ilikulu ilyakapile na ku mutunta konse. Pano baLesa balukufwaya abantu ukulukwikala pa calo. Pano kabatatika ukututeyanisisye’fintu. Mba nindo bacitile?
Mu kutanga lukoso mu calo mwalukufwaikwa ukutuba. BaLesa balilengele ukutuba ukufuma ku kasuba ku kutufya pa calo. BaLesa balilengele ukweba’ti kulukubako impindi ya busiku eli ne mpindi ya kasuba. Panuma yafyefyo baLesa balilengele umutunta ukubapo peulu lya menda ayali mu cisiba.
Pa kutanga tapaalipo neli cimo pa mutunta. Calukuboneka koti cikope ulukubona’pa. Tapaalipo amaluba, ifiti neli ni nama. Tamwali neli lisabi ilili lyonse mu cisiba. BaLesa baali ne milimo iingi iya kupyunga pakweba’ti icalo cibe iciweme ukwikalamo abantu ne nama.
Jelemiya 10:12; AbaKolosai 1:15-17; Ifyakutaŋga 1:1-10.
Ifyakwipusya
- Mba nipi ifintu fyonse ifiweme fifumine, kabili kani ungapele’cakubwenako?
- Nicindo baLesa batatikilepo ukulenga?
- Inkalamba ya kutanga mba yali syani iilibelele?
- Londolola ifi icalo calukuboneka pa kutanga lukoso. (Bona pa cikope.)
- Kani baLesa balitatikile syani ukuteyanye’calo ukube’celelwe ukwikalwapo inama ne bantu?
Ifyakwipusya na fimbi
- Pendeni Jelemiya 10:12.
Mba niisa imibelo ya baLesa iibonwa ukupitila mu bulengesi bwabo? (Yisa. 40:26; Loma. 11:33)
- Pendeni AbaKolosai 1:15-17.
Mba nifindo baYesu bapyungileko mu bulengesi, kabili ici cilyelelwe ukukuma syani ifi tubabona? (Kolo. 1:15-17)
- Pendeni Ifyakutaŋga 1:1-10.
Kani icalo califumine pi? (Taŋ. 1:1)
Mba kani nifindo fyacitikile mu kasuba ka kutaŋga aka bulengesi? (Taŋ. 1:3-5)
Londolola ifyacitikile mu kasuba ka bubili aka bulengesi. (Taŋ. 1:7, 8)
