THIL tha kan neih zawng zawng hi Pathian hnena mi an ni. Chhuna eng min pe turin ni, zanah eng thenkhat kan neih theihna nan thla leh arsite a siam a. Tin, kan chenna turin Pathianin leilung a siam bawk.

Mahse, ni, thla leh arsite leh leilung chu Pathian siam hmasak berte an ni lo. A hmasa ber chu enge ni i hria em? Pathianin amah ang mite a siam hmasa a. Pathian kan hmu thei lo ang bawkin, chung mite chu kan hmu thei lo va. Bible-ah chuan chung mite chu vantirhkohte vuah an ni. Vana ama hnena cheng turin Pathianin vantirhkohte a siam a ni.

Pathian siam hmasa ber vantirhkohte chu a dang bik em em a. Pathian Fapa hmasa ber a ni a, a Pa hnenah a thawk a. Thil dang zawng zawng siam turin a Pa a tanpui a. Ni leh thla leh arsite leh kan leilung pawh hi siam turin a tanpui.

Chutih lai chuan leilung chu eng ang nge ni? A tirin leilungah tumah an cheng thei lo. Ram zawng zawng chungah hian tuifinriat zau pui chauh lo chu engmah a awm lo. Mahse Pathianin leilungah an chen a duh a. Chuvangin kan tan thilte a peih tan ta a. Enge a tih tak?

A hmasa berah leilungin eng a mamawh a. Chutichuan ni atanga eng chu Pathianin leilung a entir a. Chhun leh zan a lo awm ve ve theihna turin a siam a. A hnuah Pathianin tuifinriat tui chungah chuan khawmual a rawn awmtir a.

A tirin khawmualah chuan engmah a awm lo. Heta i milem hmuh ang mai hi a ni. Pangpar emaw thing emaw an awm lo. Tuifinriatah pawh sangha pakhat mah a awm lo. Ramsa leh mite tana chenna nuam taka leilung hi siam turin Pathianin thawh tur tam tak a la nei.