Sturka 1

Gâd Diara Nani Paski Ta Krikan

YAWAN diara pain nani sut bri ba Gâd wina balan. Witin yu ba paskan kakna ra ingni wanki kabia wisi bara kati slilma nani ba tihmia ra ingni wiria wanki kabia dukyara. Bara tasba na yawan iwbia dukyara paskan.

Sakuna yu, kati, tasba bara slilma nani ba, Gâd pas paskras kan. Dia pas paskan ba nu sma ki? Upla nani witin baku ba pas paskan. Yawan witin nani ra sip kaikras, sim Gâd ra kaikras ba baku. Baibil ba naha uplika nani ra insal nina makisa. Gâd naha insalka nani ra paskan witin wal heven ra iwi kabia dukyara.

Pas insalka Gâd paskan ba sat wala kan. Gâd luhpia pas ba witin kan, bara ai Aisika wal wark taki kan. Gâd ra sin help munan diara wala nani sut ba paskaia dukyara. Yu, kati, slilma nani bara wan tasbaia na kat sin.

Blasi pyua ra, tasba ba nahki kan ki? Upla kumi sin tasba ra iwaia sip apia kan. Kabu tara kum baman tasba aiska ba pura biki bri kan. Sakuna Gâd brinka kan upla nani tasba ra iwbia. Baha mita, witin mahka tasba ba ridi daukan yawan dukyara. Dia daukan luki?

Pas ba, tasba ba ingni nit kan. Baha mita, Gâd yaban yu ingnika ba tasba purara ingwbia. Baku daukan, kakna tihmia bara kabia dukyara. Ningkara witin yaban tasba ba kabu munuhta wina purara bal takbia.

Taura, tasba purara diara kumi sin apu kan. Man naha lilkika ra kaikisma na baku kan. Tangni, dus bara daiwan nani sin apu kan. Kabu ra kat sin inska nani apu kan. Gâd wark ailal daukaia bri kan, tasba na painkira dauki upla bara daiwan nani ba rayaka kum pain brih iwbia dukyara.

Jirimaia 10:12; Kolosi 1:15-17; Blasi sturka 1:1-10.