STORJA 1
Alla Jibda Jagħmel l-Affarijiet
L-AFFARIJIET tajbin kollha li għandna ġejjin mingħand Alla. Hu għamel ix-xemx biex jagħtina d-dawl matul il-jum, u l-qamar u l-istilel ħalli jkollna xi dawl bil-lejl. U Alla għamel id-dinja biex aħna ngħixu fuqha.
Imma x-xemx, il-qamar, l-istilel, u d-dinja ma kinux l-ewwel affarijiet li għamel Alla. Taf x’għamel l-ewwel? L-ewwel Alla għamel persuni bħalu. Ma nistgħux narawhom lil dawn il-persuni, bħalma ma nistgħux naraw lil Alla. Fil-Bibbja dawn il-persuni jiġu msejħin anġli. Alla għamel l-anġli biex jgħixu miegħu fis-sema.
L-ewwel anġlu li għamel Alla kien speċjali ħafna. Hu kien l-ewwel Iben t’Alla, u hu ħadem maʼ Missieru. Hu għen lil Alla biex jagħmel l-affarijiet l-oħrajn kollha. Hu għen lil Alla biex jagħmel ix-xemx, il-qamar, l-istilel, kif ukoll id-dinja tagħna.
Kif kienet id-dinja dakinhar? Fil-bidu ħadd ma setaʼ jgħix fuq l-art. Ma kien hemm xejn iktar ħlief baħar kbir ħafna t’ilma fuq wiċċ l-art kollha. Imma Alla ried li n-nies jgħixu fid-dinja. Għalhekk, hu beda jlesti l-affarijiet għalina. X’għamel?
L-ewwel nett, id-dinja kellha bżonn id-dawl. Għalhekk, Alla għamel li d-dawl tax-xemx jiddi fuq id-dinja. Hu rranġa l-affarijiet biex ikun hemm il-jum u l-lejl. Wara, Alla ġiegħel li l-art toħroġ minn taħt l-ilma tal-baħar.
Għall-ewwel ma kien hemm xejn fuq l-art. Kienet tidher bħall-istampa li tara hawn. Ma kienx hemm fjuri, siġar, jew annimali. U ma kienx hemm ħuta waħda fil-baħar. Alla kellu ħafna iktar xogħol x’jagħmel biex l-art tkun sabiħa ħafna ħalli jgħixu fiha l-annimali u n-nies.