TLAPOUALISTLI 1

ToTajtsin Dios opejki tlachijchiua

NOCHI tlen kuali otechmakak toTajtsin Dios. Ye okichijchi Tonaltsin pampa ma techtlauili itech tonal, uan Metstli uan sitlalmej pampa tepitsin ma techtlauilikan itech yoak. Uan Tlaltikpak pampa itech ma tichantikan.

Maski ijkon, toTajtsin Dios amo achto okinchijchi Tonaltsin, Metstli, sitlalmej uan Tlaltikpak. ¿Tikmati tlen achto okichijchi? Achto, okinchijchi espíritus ijkon ken ye. Yejuan amo ueli tikinmitaj, ijkon ken amo tikitaj toTajtsin Dios. Biblia kintokayotia ángeles. ToTajtsin Dios okinchijchi ángeles pampa ma chantikan iuan ye itech iluikak.

Achto ángel tlen toTajtsin Dios okichijchi amo okatka ken oksekimej. Ye okatka achto iKone toTajtsin Dios, uan otekitik iuan iTajtsin. Okipaleui toTajtsin Dios ma kichijchiua nochtin oksekimej tlamantin. Okipaleui ma kichijchiua Tonaltsin, Metstli, sitlalmej uan noijki Tlaltikpak kanin tichantij.

¿Ken okatka Tlaltikpak? Achto, amo akaj uelia chantis itech Tlaltikpak. San okatka atl. Maski ijkon, toTajtsin Dios kinekia ma chantikan tlaltikpaktlakamej itech Tlaltikpak. Ik non, opejki kiyektlalia pampa itech tichantiskej. ¿Tlen okichi?

Achto, Tlaltikpak monekia kipias tlauili. Ik non, toTajtsin Dios okichi Tonaltsin ma tlaui ipan Tlaltikpak. Ijkon uelis tlanesiskia uan tlayoaskia. Uan satepan okichi tlali ma tlejko uan atl ma mokaua tlakxitlan.

Achto amo itlaj okatka ipan Tlaltikpak. Okatka ken moita itech nin tlaixkopinal. Amo okatkaj xochimej, kuajmej nion yolkamej. Itech atl amo okatkaj michimej. ToTajtsin Dios okipiaya miak tekitl pampa kichiuaskia kuali ma nemikan yolkamej uan tlaltikpaktlakamej ipan Tlaltikpak.

Jeremías 10:12; Colosenses 1:15-17, NM; Génesis 1:1-10.