OVIPUKA aviho oviwa tunavio viatuka ku Huku. Huku walinga ekumbi opo lituavele otyitei komutenya. Walinga ohanyi no nonthungululu opo tukale notyitei kounthiki. Tupu walinga oohi opo tukalemo.

Anthi ekumbi, nohanyi, no nonthungululu, noohi, havioko Huku atetekela okulinga. Ove utyii oityi Huku alinga tete? Huku tete walinga ovanthu velifua nae muene. Ngetyi katupondola okumona Huku, tupu katupondola okumona ovanthu ovo. Mombimbiliya ovanthu ovo vatiwa onoandyu. Huku walinga onoandyu opo mbukale nae keulu.

Oandyu Huku alinga tete ankho yakolela unene. Aikala Omona wotete wa Huku, iya aundapa na Tate yae. Omona oo, wakuatesako Huku okulinga ovipuka aviho. Wakuatesako Huku okulinga ekumbi, nohanyi, no nonthungululu, noohi yetu.

Oohi ankho ikahi ñgeni? Konthyimbi ankho nawike upondola okukala pano pohi. Kombanda yoohi aiho ankho kutupu natyike. Ankho kuna vala elunga enene. Anthi Huku wahandele pano pohi pakale ovanthu. Ngotyo, Huku wahimbika okulinga ovipuka pala onthue. Oityi Huku alinga?

Tete ankho oohi yesukisa otyitei. Moluotyo, Huku walinga ekumbi opo liave otyitei pano pohi. Huku wetyilinga monkhalelo imue opo kukale otyinthiki notyitenya. Konyima yotyo, Huku wakukutisa oohi.

Tete, ankho kutupu natyike kombanda yoohi. Oohi ankho ikahi ngetyi uluete polutalatu apa. Ankho kutupu onofololi, nomiti, no vinyama. Melunga ankho mutupu onohi. Ngotyo, Huku ankho una ovilinga ovinene pala okuhiwisa oohi opo ovanthu novinyama vapondole okukalamo.