TONKHE tintfo letinhle lesinato tivela kuNkulunkulu. Wasidalela lilanga kuze lisinikete kukhanya emini, kanye nenyanga netinkhanyeti kuze kusikhanyisele ebusuku. Nkulunkulu usentele umhlaba kutsi sihlale kuwo.

Lilanga, inyanga, tinkhanyeti kanye nemhlaba akusito tintfo Nkulunkulu lacala ngato kutidala. Uyati yini kutsi wadalani kucala? Kwekucala Nkulunkulu wadala bantfu labanjengaye. Angeke ukwati kubabona, njengoba naNkulunkulu singeke sakwati kumbona. EBhayibhelini labantfu babitwa ngekutsi tingilosi. Nkulunkulu wadala tingilosi kutsi tihlale naye ezulwini.

Ingilosi yekucala Nkulunkulu layidala beyibaluleke kakhulu. BekuyiNdvodzana Yakhe yekucala lebeyisebenta Naye ekudaleni tonkhe tintfo. Yabambisana naNkulunkulu nakadala lilanga, inyanga, tinkhanyeti kanye nemhlaba lesihlala kuwo.

Ngaleso sikhatsi wawunjani umhlaba? Ekucaleni bekute lobekangaphila kuwo ngoba wawumbonywe ngemanti lamanyenti. Kodvwa Nkulunkulu abefuna kutsi kuhlale bantfu emhlabeni, kungako acala kusilungisela wona. Wenta njani?

Umhlaba wawudzinga kukhanya. Ngako Nkulunkulu wabangela kukhanya kwelilanga kutsi kukhanyise emhlabeni. Wenta kwaba nemini nebusuku. Ngemuva kwaloko wabangela kutsi emanti abutsane ndzawonye kute kuvele umhlaba lowomile.

Ekucaleni umhlaba bewute lutfo. Bewufanana nalesitfombe losibonako lapha. Betingekho timbali, tihlahla kanye netilwane. Etilwandle bekute ngisho netinhlanti. Nkulunkulu abenemsebenti lomnyenti lebekumelwe awente kute umhlaba ube yindzawo lenhle kubantfu nasetilwaneni.