IBORO luejokak kere luijaar oni ebunitos kanejai Edeke. Abu kosubu akolong kanu aijaikin oni aica paaran, kede elap ka aicer da aijanakin oni aica kware. Abu Edeke kiswama akwap kanu oni aiboi kotoma ke.

Konye, mere akolong, karaida elap, karaida aicer, karaida akwap mam araasi iboro luabu Edeke kogeu aisub. Ijeni ijo, inyo araai yenisodit? Abu Edeke kogeu ber aisub itunga luaputosi kangesi. Mam oni ipedori aanyun itunga luu kwape mam oni ipedoria aanyun Edeke. Kotoma Obaibuli, itunga lu enyaritai imalaikan. Abu Edeke kosub imalaikan aiboi kanges kotoma akuj.

Emalaika losodit Edeke aisub araai loitegelikina. Araai ngesi Okoku losodit loka Edeke, ido da abu kiswamanta nepepe ka Papake. Abu ingarak Edeke aisub iboro luce kere. Abu ingarak Edeke aisub akolong, elap, aicer ka akwap wok da.

Ekoni bodo akwap ai kapak kangin? Kotoma ageunet, amamei yen apedori aiboi kotoma akwap. Amamei idiobore kere dimarai angolol nakipi adiopet nati erumarit akwap kere. Konye akoto Edeke itunga aiboi kotoma akwap. Aso abu kogeu aitemonokin iboro kanuwok. Inyo abu ngesi iswama?

Aso, nasodit akoto do akwap aica kwape amutonor. Abu do Edeke koinak akolong acaikin akwap. Abu ngesi kosubak nges tetere ejaun akware ka apaaran. Akaulo kangun abu do Edeke kikeu Akwap kuju nakakipi nujaasi toma angolol.

Kageunet amamei lbore cut ajai toma akwap. Asubit akwap bala aputo na iteei ijo kane. Amameete aturo, karaida ikito, karaida itiang. Amemeete agaria kotoma angololin. Ajaatar do Edeke cut ka aswam naapol kanu aitaraun akwap naejok kanuka itiang ka itunga aiboi kotoma.