БИСТЕ бар бүгү-ле эки чүүлдер — Бургандан. Хүндүс бистерге чырык болзун дээш хүннү, а дүне шуут караңгы болбазын дээш айны болгаш сылдыстарны ол чаяаган. Бурган биске черни база чаяап берген.

Ынчалза-даа ай, хүн, сылдыстар болгаш чер эң бир дугаар чаяаттынмаан. Бир дугаарында Бурган чүнү кылганыл, билир сен бе? Бодунга дөмей хуу-боттарны. Бурганны көрүп шыдавас-биле дөмей, оларны база көрүп шыдавас бис. Библияда оларны дээрниң төлээлери деп адаан. Дээрниң төлээлери Бурган-биле кады дээрге чурттаар ужурлуг турган.

Бурганның бир дугаар чаяаган төлээзи бир тускай болган. Ол бодунуң Адазы-биле кады ажылдап турган Бурганның бир дугаар Оглу-дур. Ол дээрниң төлээзи өске арткан чүүлдерни чаяарынга Бурганга дузалажып турган. Айны, хүннү, сылдыстарны база бистиң черивисти.

Чер ол үеде кандыг хевирлиг турганыл? Баштай аңаа кым-даа чурттавайн турган. Бүдүн черни шыпкан чүгле чаңгыс улуг суглуг океандан өске, долгандыр чүү-даа чок турган. Ынчалза-даа Бурган чер кырынга кижилерни чурттазын деп күзээн. Ынчангаш ол ону биске белеткеп эгелээн. Ол чүнү кылыпкан деп?

Бир-ле дугаарында черге чырык херек болган. Ынчангаш Бурган чер кырынче хүннүң херелдерин угландырыпкан. Хүн биле дүн солчуп турар кылдыр, ол кылган. Сөөлзүредир Бурган черни океандан бедик кылдыр көдүрүпкен.

Баштай чер кырынга чүү-даа чок турган. Ол бо чурукта-биле дөмей турган. Ооң кырынга чечектер-даа, ыяштар-даа, дириг-амытаннар-даа чок турган. Далайларда чаңгыс-даа балык чок турган. Черге чуртталга кижилерге болгаш дириг-амытаннарга ёзулуг-ла таарымчалыг болзун дээш, Бурганны ам-даа хөй ажыл манап турган.