YINDU yosope yambone yatukwete yatyocele kwa Mlungu. Jwalakwe ŵapanganyisye lyuŵa kuti lilangucisyeje musi, soni mwesi ni ndondwa kuti tupateje kulanguka cilo. Mlungu ŵapanganyisye cilambo capasi kuti tutamejemo.

Nambo lyuŵa, mwesi, ndondwa, soni cilambo capasici nganiyiŵa yindu yandanda kuyipanganya Mlungu. Ana akumanyilila caŵatandite kupanganya Mlungu? Mlungu candanda ŵapanganyisye ŵandu mpela jwalakwejo. Ngakomboleka kwawona jemanjaji, mpelasoni, mwayiŵelele kuti yili yangakomboleka kum’wona Mlungu. M’Baibulo ŵandu ŵeleŵa akusiŵakolanga kuŵa malayika. Mlungu ŵapanganyisye malayika kuti atameje nago kwinani.

Lilayika lyandanda kulipanganya Mlungu lyaliji lyapajika. Pakuŵa lyaliji lyandanda kulipanganya, lyaliji mpela mwanace jwandanda jwa Mlungu, soni lyakamulaga masengo yalumo ni Atatigwewo. Lyamkamucisye Mlungu kupanganya yindu yosope. Lyamkamucisye Mlungu kupanganya lyuŵa, mwesi, ndondwa, soni cilambo cetu capasici.

Ana pandaŵijo cilamboci cawonekaga wuli? Pandanda pene pangali jwakakombolece kutama pacilamboci. Paliji pangali cilicose nambo cinyasa cekulungwa mnope cacaliji pacilambo cosope. Nambo Mlungu ŵasakaga kuti ŵandu atameje pacilambo capasico. M’yoyo ŵatandite kulinganya yindu kuti m’weji tukombolece kutama pacilamboco. Ana ŵatesile catuli yeleyi?

Candanda, pacilambopa pasosekwaga lilanguka. M’yoyo Mlungu ŵatendekasisye kuti lilanguka lyakutyocela ku lyuŵa lilangucisye pacilambo capasi. Ŵalipanganyisye lilangukalyo kuti kuŵeje musi ni cilo. Kaneko Mlungu ŵatendekasisye kuti mkuli uwonece penani pa cinyasa cekulungwa.

Pandanda paliji pangali cilicose pacilambo capasici. Pawonekaga mpela mwakuyiwonela pa ciwulilipa. Paliji pangali maluŵa, yitela, kapena yinyama. Atamose somba mwaliji mwangali m’nyasa. Mlungu ŵakwete masengo gamajinji gakulinganya cilamboci kuti ciŵe cambone kutama yinyama ni ŵandu.