EMAÑAMÍNA ko Yvýre! Iporãitépa umi mbaʼe jahecháva! Emañami pe kapiʼipe ha umi yvyra matakuérare, umi yvoty ha umi animalkuérare. Rehechápa pe elefánte ha umi león?

Moõgui piko osẽ ko hardín porãite? Jahechamína mbaʼéichapa Ñandejára opreparavaʼekue ko Yvy ñandéve g̃uarã.

Ñepyrũrã, Ñandejára ojapo kapiʼipe ojahoʼi hag̃ua ko yvy. Ha ojapo opaichagua plánta, michĩva ha tuicháva. Koʼã mbaʼe okakuaáva omoporãve ko Yvy. Péro ojapo hetave mbaʼe. Oĩ avei heta plánta omeʼẽva ñandéve jaʼuvaʼerã hetereíva.

Upe rire Ñandejára ojapo umi pira oiko hag̃ua ýpe ha umi guyrakuéra oveve hag̃ua amo yvate. Ojapo umi jagua, mbarakaja ha kavaju; umi mymba tuicháva ha michĩva. Mbaʼeichagua mymbápa oĩ pe reikohárupi? Imbaʼeporãitépa Ñandejára ojapóvo koʼã mbaʼe ñandéve g̃uarã!

Upéi, Ñandejára ojapo peteĩ mbaʼe iporãitereíva peteĩ hendápe. Ohenói chupe hardín de Edén. Pe hardín iperfektovaʼekue. Upépe opa mbaʼe iporãiterei. Ha Ñandejára oipota ko Yvy tuichakuégui oiko peteĩ hardín upeichagua.

Péro emañami jey ko taʼangáre. Ndépa reikuaa mbaʼépa ohecha Ñandejára oikotevẽha ko hardín? Jahechamíta upéva.