RRI otọakpọ na eva etenẹ! Ẹvẹ eware kpobi i wome te! Rri ẹbe na gbe ire na, gbe idodo avọ erao na. Kọ whọ sai vuhu eni avọ ikpohrokpo na?

Ẹvẹ ọgbọ owoma ọnana ọ rọ ze? Orọ ere, j’oma rri epanọ Ọghẹnẹ ọ rọ ruẹrẹ otọakpọ na họ k’omai.

Orọ ọsosuọ, Ọghẹnẹ o ru ẹbe ọrọrọ re ọ vọ otọ na. O te je ru oghẹrẹ ekakọ avọ ire esese gbe ilogbo. Eware enana nọ e rẹ rua na i te fiobọhọ ru otọakpọ na wowoma. Rekọ i re ru vi erei. Ibuobu rai e rẹ k’omai emuore nọ ọ rẹ were gaga.

Kẹsena Ọghẹnẹ o te ti ru iyei nọ e rẹ ya eva ame gbe evra nọ e rẹ ra eva ehru. O ru erakọ, ilogbo gbe enyenya; erao ilogbo gbe erao esese. Didi erao e be ria kẹle uwou ra? Kọ ma gbẹ ghọghọ nọ Ọghẹnẹ o ru eware enana kpobi k’omai?

Urere riẹ, Ọghẹnẹ o te ru abọ jọ otọakpọ na fihọ oria oghẹrẹ sa. O te se oria onana ogege Idẹn. Ọ jọ gbagba gaga. Oware nọ o jariẹ kpobi u je wowoma. Yọ Ọghẹnẹ ọ gwọlọ nọ otọakpọ na kpobi o rẹ te jọ wọhọ ogege owowoma ọnana nọ o ru na.

Rekọ wariẹ ri ifoto ogege ọnana. Whọ riẹ oware jọ nọ Ọghẹnẹ ọ ruẹ nọ o rẹ te jariẹ hẹ? Jo ma rri.