TAQSIṬ TIS 2

Lǧennet icebḥen

MUQEL tura lqaɛa! Acḥal i tecbeḥ! Wali leḥcic, ijeǧǧigen, ttjuṛ d lḥiwan meṛṛa. Tzemreḍ a d-​tessekneḍ lfil akk-​d yizmawen?

Ansi i d-​ikka leǧnan-​agi icebḥen? Uqbel a nwali annect-​a, a nẓer amek i ɣ-​d-​ihegga Ṛebbi lqaɛa.

Di tazwara Ṛebbi yessemɣi-​d leḥcic ɣef lqaɛa. Ixleq-​ed yal ṣṣenf n yemɣan imecṭaḥ, n inijel d ttjuṛ. Tizzegzewt-​agi meṛṛa tcebbeḥ lqaɛa yerna tefka-​yaɣ-​d ula d lfakyat ẓiden.

Umbeɛd, Ṛebbi ixleq-​ed iḥutiwen yeţɛumun deg waman yerna-​d ifṛax yeţferfiren deg igenni. Ixleq-​ed iqjan, imcac, iɛawdiwen d lḥiwan meṛṛa nniḍen. Anwi lḥiwan i gellan anda i teţɛiciḍ? Annect-​agi meṛṛa i nekni iwumi i t-​id-​ixleq Ṛebbi. Mačči d ayen i ɣ-​issefṛaḥen?

Ɣer taggara, Ṛebbi yerra yiwen wemḍiq ɣef lqaɛa d amkan ur necbi wayeḍ. Isemma-​yas leǧnan n Ɛidin. D leǧnan itɛeddan! Ayen akk yellan deg-​s icbeḥ aṭas. Ṛebbi yebɣa lqaɛa meṛṛa aţ-​ţuɣal am leǧnan-​agi ifazen.

Lameɛna, muqel ţţeswiṛa-​yagi tikkelt nniḍen. Ṛebbi iwala belli txuṣṣ yiwet n lḥaǧa di leǧnan-​agi. Teẓriḍ d acu-​ţ?

Laṣel n ddunit 1:11-25; 2:8, 9.