LUK di wɔl na dis pikchɔ! Ɔltin fayn, nɔto so? Luk di gras ɛn di tik dɛn. Luk di flawa dɛn ɛn ɔl di animal dɛn. Yu sabi uswan na ɛlifant ɛn uswan na layɔn?

Na udat mek dis fayn gadin? Na Gɔd. Lɛ wi si aw Gɔd mek di wɔl fɔ lɛ wi go ebul de de.

Fɔs, Gɔd mek gras gro fɔ kɔba di grɔn. Dɔn, i mek ɔlkayn flawa, bush ɛn tik dɛn. Ɔl dɛn tin ya ɛp fɔ mek di wɔl fayn, ɛn bɔku pan dɛn na tin fɔ it ɛn dɛn swit.

Leta, Gɔd mek fish dɛn fɔ swim na di wata ɛn bɔd dɛn fɔ flay na di skay. I mek dɔg, pus ɛn ɔs dɛn. I mek big ɛn smɔl animal dɛn. Us animal dɛn yu sabi? Yu nɔ fil se wi fɔ gladi we Gɔd mek ɔl dɛn tin ya fɔ wi?

Afta Gɔd mek ɔl dɛn tin ya, i mek wan pat na di wɔl difrɛn. I kɔl dis ples di gadin na Idɛn. Dis ples bin fayn te i lɛf lɛf. Ɔltin we bin de na dis ples bin fayn. Ɛn Gɔd bin want mek ɔlsay na di wɔl tan lɛk dis fayn gadin.

Bɔt luk di pikchɔ bak. Yu no wetin Gɔd si se nɔ de de? Lɛ wi si.