ပူ ၂
တၤသၣ်လီၢ်ဖိလၢ ဃံလၤဒိၣ်မး အဂ့ၢ်
ကွၢ်ဟီၣ်ခိၣ် လၢအဖျါလၢတၢ်ဂီၤအံၤတဘီ. ဃံလၤမးလီၤနီၣ်. ကွၢ်နီၣ်အပျီ, ဒီးသ့ၣ်ထူၣ်တဖၣ်, ဖီတဖၣ်, ဒီးဆၣ်ဖိကီၢ်ဖိတဖၣ်တဘီ. ကဆီ, ဒီးခ့ယုၢ်တဖၣ် အိၣ်ဖဲလဲၣ်န့ၣ်နထံၣ်ဧါ.
တၤသၣ်အလီၢ်လၢအဃံလၤဒ်အံၤ ဟဲကဲထီၣ်ဝဲဒ်လဲၣ်န့ၣ် နသ့ၣ်ညါဧါ. ကစၢ်ယွၤ ကတဲာ်ကတီၤန့ၢ်ပှၤဟီၣ်ခိၣ်အံၤ ဒ်လဲၣ်န့ၣ် ကွၢ်သကိးတက့ၢ်.
လၢအဆိန့ၣ် ဒုးကျၢၢ်ဘၢခိလၢနီၣ်ဧိၤမံၤဧိၤလီၤ. ဝံၤအလီၢ်ခံ တၢ်မုၢ်တၢ်ဘိဖိတဖၣ်, တပှီာ်ဖိတဖၣ်ဒီး သ့ၣ်ထူၣ်တဖၣ်လီၤ. တၢ်မုၢ်တၢ်ဘိလၢအဒိၣ်ကပျိၤဒိၣ်တီၣ်တဖၣ်အဃိ ကဲထီၣ်တၢ်ကွၢ်ကျၢၤသးဝဲန့ၣ်လီၤ. တမ့ၢ်ဒံးထဲအံၤဘၣ်. သ့ၣ်ထူၣ်အအါတဖၣ် ဟ့ၣ်ပှၤတၢ်အီၣ်ဝံၣ်အီဆၢဒိၣ်မး စ့ၢ်ကီးန့ၣ်လီၤ.
လၢခံန့ၣ် ကစၢ်ယွၤတ့လီၤညၣ်တဖၣ်ဝံၤ မၢအအိၣ်လၢထံကျါလီၤ. လၢကယူၤလၢမူကပိာ်လိၤအဂီၢ် မၤဝဲစ့ၢ်ကီးထိၣ်တဖၣ်န့ၣ်လီၤ. ထွံၣ်တဖၣ်, သၣ်မံယီၤတဖၣ်, ကသ့ၣ်တဖၣ်စ့ၢ်ကီး မၤဝဲလီၤ. မၤဝဲဆၣ်ဖိကီၢ်ဖိ အဒိၣ်ဒီးအဆံးတဖၣ်လီၤ. လၢသုဟံၣ်ကပၤန့ၣ် ဆၣ်ဖိကီၢ်ဖိမနုၤတဖၣ်အိၣ်လဲၣ်. တၢ်တဖၣ်န့ၣ် မ့ၢ်လၢယွၤမၤန့ၢ်ပှၤအဃိ တဂ့ၤလၢပစံးဘျုးကစၢ်ယွၤန့ၣ်ဘၣ်ဧါ.
လၢခံကတၢၢ်န့ၣ် ကစၢ်ယွၤမၤကဲထီၣ်လီၤဆီဝဲ ဟီၣ်ခိၣ်အလီၢ်တလီၢ်န့ၣ်လီၤ. တၢ်လီၢ်အဝဲန့ၣ် ကိးဝဲလၢဧ့ၤဒ့ၣ်တၤသၣ်အလီၢ်န့ၣ်လီၤ. ဂ့ၤတုၤဒၣ်လဲာ်ပတဲအီၤတသ့ဘၣ်. ဖဲနအဲၣ်ဒိးကွၢ်န့ၣ် ကွၢ်တက့ၢ်. ဂ့ၤခဲလၢာ်လီၤ. ကစၢ်ယွၤ အဲၣ်ဒိးဒုးကဲထီၣ်ဝဲဟီၣ်ခီၣ်ဒီဖျၢၣ်ညါ ဒ်တၤသၣ်အလီၢ်ဖိအံၤအသိးန့ၣ်လီၤ.
ဘၣ်ဆၣ်သနာ်က့ ကွၢ်ကဒီးတၢ်ဂီၤအံၤတက့ၢ်. ယွၤထံၣ်ဝဲ တၢ်လိၣ်မနုၤလဲၣ်န့ၣ်နသ့ၣ်ညါဧါ. မ်ပကကွၢ်သကိးတက့ၢ်.
