Esimwititi 2: Sikunino Sosiwa
KO TARA si kevhu apa! Ee, ngapi tupu omu yina fuura nayinye! Tara kowayi noyitji, nombya noyikorama nayinye. To mono nzovhu novanyime?
Ngapi omu sa monekere po sikunino sosiwa esi? Tu tareni asi ngapi omu Karunga ga tu wapaikilire evhu.
Pomuhowo, Karunga kwa rugene wayi woutarara u kudimike evhu. Age kwa rugene hena yimenogona noyihwa noyitji nayinye yokulisiga-siga. Yininke eyi yokumena kuvatera evhu li moneke nawa. Nye oyo kapisi yelike ayi rugana. Sinzi sayo kutupa hena nondya donontovara.
Konyima, Karunga kwa rugene nomfi di zoge momema ntani noyidira yi tuke meguru. Age kwa rugene nombwa noyimbisi nononkambe; yikorama yoyinene neyi yoyinunu. Yikorama musinke ya kara pepi nembo lyeni? Nani kapi tayi tu hafesa asi Karunga ga tu ruganena yininke nayinye eyi?
Mouhura, Karunga kwa rugene ruha rumwe rwevhu ru kare evango lyokulikarera unene. Age kwa rukire evango eli asi sikunino saEdeni. Aso kwa wepe mokusikilira mo. Yininke yaso nayinye kwa kere yoyiwa unene. Ano Karunga kwa here asi evhu nalinye li kare ngwendi sikunino sosiwa esi ga rugene.
Nye tara hena kefano lyosikunino esi. Ono diva asi yisinke ga mwene Karunga asi simpe yina hepa po ndi?
Genesis 1:11-25; 2:8, 9
Mapuro
- Ngapi omu ga wapaikira Karunga evhu li kare embo lyetu?
- Singonona yikorama yoyinzi yokulisiga-siga eyi ga rugene Karunga. (Tara efano.)
- Morwasinke sikunino saEdeni sa likarerere?
- Yisinke ga here Karunga evhu nalinye li kare?
Mapuro gokugwederera ko
- Resa Genesis 1:11-25.
Yinke ga satire Karunga mezuva lyautatu lyesito?
Yinke ya monekere mezuva lyaune lyesito?
Yikorama musinke ga sitire Karunga mezuva lyautano ntani lyountazimwe?
- Resa Genesis 2:8, 9.
Yitji yivali yokulikerera musinke ga tulire Karunga mosikunino, ntani yisinke ya fanekesere?
