Icisimicisyo 2: Ibala Iliweme
LOLESYA icalo ici! Fyonse fili ifiweme! Lolesya icani ne fiti, amaluba ne nama syonse. Kani ungasonta insofu ne nkalamu?
Kani ili bala iliweme’fi lyalibeleko syani? Ngatubone ifi baLesa batwansikile icalo.
Pa kutatika, baLesa balilengele icani icibisi icakufimba pa musili. Kabili balilengele imitundu yonse iya fimenene pansi finini finini ne finsokela ne fiti. Ifi ifimenene filalenge’calo ukuboneka iciweme. Pano filacita ificilile pali cici pakuti ifingi filatupela ne fyakulya ifyumfwika bwino.
BaLesa balilengele ne sabi ilyenda mu menda ne fyuni fyakupalala mwiulu. Balilengele imbwa, bapusi na bakafwalo; inama isikulu ne sinini. Mba nisisa nama isiikala apepi na penu? Kani tatusangalala pakweba’ti baLesa balitulengeele fyonse’fi?
Mukupelako, baLesa balilengele iciputusya cimo ica calo icilibelele. Balicilicile ibala lya Edeni. Lyali iliwaminine. Fyonse lukoso ifyalimo fyali ifiweme. Kabili baLesa balifwaile icalo conse ukuba koti nilili ibala iliweme ili balengele.
Pano lolesya pa cikope calili ibala na kabili. Kani wacisiba ici baLesa babwene ati tacalimo? Ngatubone.
Ifyakutaŋga 1:11-25; 2:8, 9.
Ifyakwipusya
- Kani baLesa balyansikile syani icalo ukuba umusi wesu?
- Simbula inama isipusenepusene isi baLesa balengele. (Bona pa cikope.)
- Mba nindo ibala lya Edeni lyabelele mupunda uulibelele?
- Kani baLesa balifwaile ati icalo conse cikabe syani?
Ifyakwipusya na fimbi
- Pendeni Ifyakutaŋga 1:11-25.
Kani nifindo baLesa balengele mu busiku bwa busitatu ubwa bulengesi? (Taŋ. 1:12)
Mba nifindo fyacitikile mu busiku bwa busine ubwa bulengesi? (Taŋ. 1:16)
Mba niisa mitundu ya nama baLesa balengele mu busiku bwa busisanu na bumo? (Taŋ. 1:20, 21, 25)
- Pendeni Ifyakutaŋga 2:8, 9.
Kani nisisa imiti sibili isilibelele baLesa babikile mwi bala, kabili kani findo syalukwimakaninako?
