Milemba Yamwaza
Chihande 2
Milemba Yamwaza
ACHITALE mavu ali hano! Vyuma vyosena viliho ocho kuwaha kana! Achitale mwila namitondo, jitemo natunyama vosena. Wamumono njamba navandumba tahi?
Milemba yamwaza kaneyi yejile ngachilihi? Chamwaza, tuchitalenu omwo Kalunga atuwahishilile mavu ano.
Chatete, Kalunga atengele mwila ututa mangana ufwike hamavu. Kaha atengele viputa namitondo yamiyachi yosena. Vyumevi hakusoka vyeji kuwahisanga hamavu. Oloze vyazata nawa milimo yayivulu. Mitondo yayivulu yeji kutuhana kulya chiyema.
Kalunga jino atengele vaishi vamutulwiji natujila vamwilu. Atengele tuwa natumeshi natuvalu; tunyama vavanene navava vavandende. Tunyama muka vatwama kwakamwihi nalimbo lyove? Kutala katwatela kuwahililako hakumona nge vyuma vyosenevi Kalunga atutengelelevyo etu nyi?
Kutwala muze, Kalunga awahishile chihanda chimwe chamavu kupwa chakukupuka chikuma. Chihela kana achivulukile ngwenyi milemba yaEtene. Yapwile yakukupuka. Vyuma vyosena vyapwilemo vyapwile vyamwaza. Kalunga asakile mavu osena akapwe ngana mwamilemba yino yamwaza atengele.
Jino achitale cheka hamuvwimbimbi wamilemba yino. Unejiva vyuma amwene Kalunga ngwenyi vinalihonoho? Tuchitalenu kanawa.